Այսօր ՀՀ երրորդ նախագահ Սերժ Սարգսյանն իր՝ «Բանակցային առաջնագծում» գրքի շնորհանդեսից հետո լրագրողների հետ զրույցում պատասխանեց այն հարցին, թե վերջինս գուցե 2018 թվականին իշխանությունն անցնցում փոխանցեց Նիկոլ Փաշինյանին, որպեսզի նոյեմբերի 9-ի բովանդակությամբ մի փաստաթուղթ վերջինս չստորագրի։
«Գիտեք, ես կարող էի այս հարցին չպատասխանել։ Ոչ, հարցը բարդ չէ, բայց դուք տեղեկություն չունեք բանակցային գործընթացի մասին, ուղղակի խորհուրդ կտամ, որ հրատարակած ժողովածուին ծանոթանաք։ Եթե ուշադիր եք եղել, գործից տեղյակ մարդիկ հաստատում են, որ ես պատրաստ եմ եղել մեր կարմիր գծերը չանցնելով խնդրին լուծում տալ, իսկ այդ հեքիաթներն, ովքեր պատմում են, իրենց ասեք, որ լավ հեքիաթագիր չեն»,-ասաց նա։
Դիտարկմանը, որ երբ Սարգսյանը նախագահ էր և ՀՀ առաջին նախագահ Լևոն Տեր-Պետրոսյանը պատրաստակամություն հայտնեց կանգնել վերջինիս կողքին, եթե Սարգսյանը փոխզիջումային տարբերակով գնար խնդրի լուծման, սակայն ներկայում շատ են դժգոհությունները, որ երբ Նիկոլ Փաշինյանը դարձավ վարչապետ, նրա կողքին չկանգեց Սարգսյանը, այլ հակառակը՝ թիմը հողատու համարեց Փաշինյանին, վերջինս արձագանքեց․
«Դուք պետք է շատ պարզ ճշմարտություն հասկանաք, որ կանգնում են ոչ թե անձի կողքին, այլ այն գաղափարի, որը կրում է անձը։ Լևոն Տեր-Պետրոսյանը շատ լավ տեսնում էր, որ այո, ես կողմնակից եմ փոխզիջման, բայց այդ փոխզիջումը չի անցնում այն նվազագույն ցանկությանը, պայմաններին, որը հնարավորություն կտար ԼՂՀ-ին և ՀՀ-ին չլինել ստորացված, որ հնարավորություն կտար արցախցիներին ապրել Ադրբեջանի կազմից դուրս։ Մենք ո՞ր գաղափարի կողքին պիտի կանգնեինք, այն գաղափարի՞, որ ասում էր՝ ինչպես ուզում ենք, այնպես էլ բանակցում ենք, ա՞յն գաղափարի շուրջ, որ ասում էր՝ մենք չենք ընդունելու, մեզ գժի տեղ ենք դնելու, բանակցային պրոցեսը տապալենք, սկսում ենք մեր սեփական կետից»,-ասաց Սարգսյանը։
Մանրամասները՝ տեսանյութում