Իսպանիան 4-1 հաղթեց Վրաստանին․ 1/4 եզրափակիչում նրա մրցակիցը Գերմանիան է

ՍՊՈՐՏ 1 Հուլիս 2024 | 00:53

Իսպանիան 4-1 հաղթեց Վրաստանին․ 1/4 եզրափակիչում նրա մրցակիցը Գերմանիան է։

Հանդիպման հաշիվը 18'-ին բացեց Վրաստանի հավաքականը։ Վրացիները հակագրոհեցին, ու եզրային փոխանցումից հետո հարձակվող Խվիչա Կվարացխելիայի դեմ պայքարելիս պաշտպան Ռոբին Լե Նորմանդը գնդակն ուղարկեց սեփական դարպասը։

39-րդ րոպեին իսպանացիներին հաջողվեց հաշիվը հավասարեցնել։ Հարձակվող Նիկո Վիլլյամսի փոխանցումից հետո «Մանչեսթեր Սիթիի» կիսապաշտպան Ռոդրին բիլիարդային հարվածով գրավեց Գիորգի Մամարդաշվիլիի դարպասը։

Իսկ արդեն 51-րդ րոպեին «Լա Ֆուրիա Ռոխան» առաջ անցավ։ «Բարսայի» հարձակվող Լամին Յամալի փոխանցումից հետո գլխի հարվածով դարպասը գրավեց ՊՍԺ-ի կիսապաշտպան Ֆաբիան Ռուիսը։

75-րդ րոպեին Իսպանիան հակագրոհի շնորհիվ 3-րդ գնդակն ուղարկեց վրացիների դարպասը։ Ֆաբիան Ռուիսի հեռահար փոխանցումից հետո Նիկո Վիլլյամսը դարձավ գոլի հեղինակ։

Իսկ արդեն 83'-ին 4-րդ գնդակը հայտնվեց Մամարդաշվիլիի դարպասում։ Աչքի ընկան փոխարինման մտած խաղացողները։ «Ռեալ Սոսիեդադի» ավագ Միկել Օյարսաբալի փոխանցումից հետո գնդակի հեղինակ դարձավ Դանի Օլմոն («Լայցիգ»)։