«Ո՞վ էր անձրևին նայում։ Վառելիքի պակաս ունեցող երկրում, հետպատերազմյա ճգնաժամային իրավիճակում հանկարծ լուր է տարածվում, որ անսահմանափակ քանակությամբ բենզին են տրամադրում։ Մինչ այդ ասել էին, որ ցիստեռնով վառելիք են բերելու, դրա համար տղամարդիկ հավաքվել էին քաղաքի կենտրոնում, սպասում էինք փրկության մեքենային։ Ադրբեջանցիներն արդեն մեր գյուղերի ու քաղաքների մատույցներում էին։ Մեկ օր ավելի մնալը համարձակություն էր։ Ընկերներով գնացինք Հայկազով ու տարբեր ուղղություններով հերթ բռնեցինք»,- MediaHub-ին մեկ տարվա հիշողություններն է պատմում Ասկերան քաղաքից 26-ամյա Արտյոմ Դանիելյանը։

Արտյոմը հրաշքով է փրկվել։ Նույնիսկ այն ժամանակ, երբ ամբողջ մարմինն այրվում էր կրակներում, հույսը չի կտրել. կրկնում էր՝ «Աստված մեծ է»:

«Պայթյունից հետո վայրկյանների ընթացքում ամեն ինչ կորավ կրակի մեջ, ու ցավից ճչացող ձայներից բացի, ուրիշ ոչինչ չէր լսվում, չէր երևում։ Հագուստս վառվում էր, իսկ ես ցավից վազում էի, չգիտակցելով, որ դրանից կրակն ավելի է ուժգնանում։ Ուժեղ անձրև էր գալիս։ Շփոթմունքից պառկել էի գետնին, որ մարմինս հովանա։ Շտապ օգնության մեքենաներն արդեն մոտենում էին։ Ես կողմնորոշվեցի, արագ հանեցի մարմնիս վրա արդեն վառված հագուստս ու շտապեցի դեպի օգնության մեքենան։ Այնտեղ ինձ երկու սրսկում արեցին և մյուսների հետ տեղափոխեցին Ստեփանակերտի հիվանդանոց»,- պատմում է Արտյոմը։ 

Երիտասարդը, որ մտածել է չի դիմանա, հիմա երախտագիտությամբ է խոսում Արցախի ու Հայաստանի բուժաշխատողների մասին։ Մարմնի 75%-ն ամբողջությամբ այրված էր։ Անգամ բժիշկները հույս չէին տալիս, որ նա կապրի։ 

«Հիվանդանոցում չեմ կարող նկարագրել տեսածս, դա դժոխքի գիշեր էր։ Բոլորն ապրել էին ուզում, բայց ցավին չէին դիմանում, մեռնում էին։ Ամբողջ հիվանդանոցում ցավից ողբացող ձայներ էին։ Հաջորդ օրը Հայաստանից եկան ուղղաթիռներն ու մեզ տեղափոխեցին Սիսիան, այնտեղից՝ Երևան»։ 

Արտյոմ Դանիելյանը մեկ ամիս բուժում է ստացել Միքայելյան հիվանդանոցում, այնուհետև՝ Այրվածքաբանության և մաշկաբանության ազգային կենտրոնում։ Պարբերաբար հաճախում է վերականգնողական կենտրոն։ 

Հրաշքով փրկված երիտասարդը հույսը ոչ ոքի վրա չի դրել։ Նախկին ուժային կառույցի ծառայողն այժմ տաքսի է վարում, որ հոգա ընտանիքի մինիմալ ծախսերը։ Ու չնայած առողջական խնդիրներին ու 7 անգամ տարած վիրահատություններին՝ կյանքին ասել է այո՛, վստահ, որ ամբողջությամբ կկազդուրվի։

Հունան Թադևոսյան