Չգիտեմ հանձնում եղել է, թե ոչ, բայց եթե եղել է հանձնում, հանձնողները վիզ չեն վերցնում, ես առանց իմանալու ինչպե՞ս ասեմ, ինչպե՞ս դատապարտեմ։ Այս մասին MediaHub.am-ի հետ զրույցում ասաց Ազգային ժողովի «Քաղաքացիական պայմանագիր» խմբակցության պատգամավոր Կնյազ Հասանովը՝ անդրադառնալով 2 քուրդ զինյալներին Թուրքիային հանձնելու վերաբերյալ տեղեկություններին։
Նա ընդգծեց, որ խճճվել է՝ քրդական, թուրքական աղբյուրները այլ բան են հայտարարում, իսկ հայկական կողմը հերքում է։
«Երկու օր է սոցցանցերից լսել եմ, որ Քրդական բանվորական կուսակցությունը մեղադրել է, որ Հայաստանը երկու զինյալներին հանձնել է թուրքական իշխանություններին, լսել եմ քննադատություններ առանձին հասարակական, քաղաքական կազմակերպություններից, անհատ մարդկանցից։ Թուրքական իշխանությունները հայտնել են՝ երկու զինյալներին բռնել են սահմանի վրա իրենց հետախուզական գործողությունների շնորհիվ։ Իրարամերժ խոսակցություններ են, ես սպասում էի, որ Հայաստանի իշխանությունները հայտարարություն անեն, երեկ ԱԱԾ-ն, Արդարադատության նախարարությունը հերքել են։ Հիմա ես ինչպես իմանամ՝ ի՞նչ է եղել, հանձնում եղել է, թե՞՝ ոչ»,-ասաց Հասանովը։
Կնյազ Հասանովը նաև ասաց, որ եթե ապացուցված չէ, որ Հայաստանի իշխանություններն են հանձնել, ինչպես մեկնաբանի, դատապարտի։ «Պիտի ապացույցներ լինեն, նույն է, որ դատարանը մեղադրյալի մեղքը չհասատատի, անձին դատապարտեն»,-ասաց նա։
Պատգամավորն ասաց, որ այժմ ինքն էլ փորձում է հասկանալ՝ ինչ է կատարվում, բայց չի էլ կարող ասել, որ քրդական, կամ հայկական կողմը ստում են։
Հիշեցնենք, նախօրեին ԱԺ «Հայաստան» խմբակցության պատգամավոր Գեղամ Մանուկյանը հայտնեց, թե Հայաստանում գտնվող Քրդստանի աշխատավորական կուսակցության (ՔԱԿ) երկու անդամներ հանձնվել են Թուրքիայի Ազգային հետախուզական կազմակերպությանը (MIT): Ավելի ուշ թե՛ ԱԱԾ-ն, թե՛ Արդարադատության նախարարությունը հերքեցին իրենց առնչությունն այդ գործընթացին ու մինչ այս պահը հայտնի չէ, թե ո՞ր կառույցն է իրականացրել արտահանձնումը:
Անի Գևորգյան