Ունենք չորս վիրավոր, որոնցից երկուսի վիճակը միջին ծանրության է, երկուսի վիճակն էլ բավարար։ Այս պահին տղաներից ոչ մեկի կյանքին վտանգ չի սպառնում։ Այդ մասին այսօր Կառավարության նիստից հետո լրագրողների հետ զրույցում ասաց առողջապահության նախարար Անահիտ Ավանեսյանը։
Նրա խոսքով՝ տղաները դեռևս Երևանում չեն, եթե կարիք լինի, ապա նոր նրանց կբերեն մայրաքաղաք։ Նախարարը նկատեց՝ տղաները բեկորային վիրավորումներ են ստացել։
Հարցին, թե Կառավարության փակ նիստի ընթացքում ի՞նչ է քննարկվել, Անահիտ Ավանեսյանը կարճ արձագանքեց՝ օրակարգային հարցեր։
Նախարարը նաև անդրադարձավ շտապ օգնության մեքենայի ուղղությամբ ադրբեջանական կողմի արձակած կրակին՝ ասելով, որ միայն դատապարտել կարելի է նման քայլը։
Ինչ վերաբերում է արցախցիներին բժշկական օգնություն տրամադրելուն, ապա Անահիտ Ավանեսյանը նշեց, որ այս պահին իրականացվում է կոնսիլիումային բժշկական օգնության տրամադրում, բժիշկները կապի մեջ են արցախցի գործընկերների հետ։
«Դեղորայքային առումով հիվանդանոցային օղակն ապահովված է»,- ասաց նա։
Մանրամասները՝ տեսանյութում։