Շրջակա միջավայրին ուղղված ծրագրերի արդյունքները պետք է լինեն հստակ և չափելի․ ՇՄՆ նախարար

Շրջակա միջավայրի նախարար Հակոբ Սիմիդյանն աշխատանքային այցով «Բնապահպանական ծրագրերի իրականացման գրասենյակ» ՊՀ-ում էր։ Նախարարը հանդիպում-քննարկում է անցկացրել ստորաբաժանումների ղեկավարների և աշխատակիցների հետ՝ ծանոթանալու իրականացվող և նախատեսվող ծրագրերի ընթացքին և արդյունքներին։

Գրասենյակի տնօրեն Արմեն Եսոյանը և տարբեր ստորաբաժանումների ղեկավարներ նախարարին են ներկայացրել ծրագրերի ընթացքը։

Նախարարը կարևորել է իրականացվող ծրագրերի անխափան և հարթ ընթացքը, քանի որ դրանցից յուրաքանչյուրն իր վերջնադյունքով միտված է Հայաստանի Հանրապետությունում շրջակա միջավայրի վիճակի բարելավմանը և քաղաքացիների կյանքի որակի բարձրացմանը։

Այս պահին Շրջակա միջավայրի նախարարության «Բնապահպանական ծրագրերի իրականացման գրասենյակի» կողմից իրականացվում են թվով 7 ծրագրեր՝

ՀՀ բնության հատուկ պահպանվող տարածքներին հարակից էկոհամակարգերի և  համայնքների հարմարվողականության կարողությունների ամրապնդում,

Ապագա առաջնորդների ներգրավում. երիտասարդների համար հարմարվողականության հիմնախնդիրների եվ լավագույն փորձի վերաբերյալ թվային կրթական մոդուլի ստեղծում,

Հայաստանում անտառների դիմակայության բարձրացում՝ մեղմացման միջոցառումների շնորհիվ հարմարեցման և գյուղական վայրերում կանաչ տարածությունների ընդլայնման միջոցով,

Կայուն կարողությունների զարգացում՝ կենսաանվտանգության  տեղեկատվական հարթակից արդյունավետ օգտվելու համար երրորդ ազգային ծրագիր,

Անցում էլեկտրական շարժունակությանը Հայաստանում,

Արթիկ քաղաքի փակ քարհանքի թափոնների և ջրհեղեղների կառավարում,

Շենքերի էներգաարդյունավետ արդիականացմանն ուղղված ներդրումների ռիսկերի նվազեցում։

Նախարարը շեշտել է, որ ծրարգրերի արդյունքները պետք է լինեն հստակ և չափելի` առանձնացնելով Հայաստանում անտառապատ տարածքների վերականգնման բաղադրիչ պարունակող ծրագրերը։ 

«Հայաստանի կառավարությունը հստակ հանձնառություն ունի երկրում ավելացնել անտառածածկ տարածքները։Եվ այդ հանձնառության կյանքի կոչման ճանապարհին չափազանց կարևոր է շարունակել արդյունքի միտված աշխատանքները միջազգային դոնոր կազմակերպությունների հետ»,-նշել է նախարարը։

Հանդիպման ավարտին նախարարը փաստել է, որ առկա է ծրագրերի ընթացիկ աշխատանքների ակտիվացման մեծ ներուժ և պետք է անել հնարավորը՝ բոլոր նախագծերին ու ծրագրերին նոր շունչ հաղորդելու և դրանք կյանքի կոչելու համար: 

Այս համատեքստում նախարար Հակոբ Սիմիդյանը կարևորվել է  գրասենյակի աշխատակիցների և նրանց մասնագիտական կարողությունների դերը և խոստացել աշխտանքներ տանել նաև գրասենյակի շենքային պայմանների բարելավման ու աշխատակիցների կարողությունների հզորացման ուղղությամբ։