Մյանմայում իշխանությունը զավթած զինվորականները հայտնել են իրենց հակառակորդների՝ երկրում հայտնի չորս դեմոկրատ ակտիվիստների մահապատժի մասին. այդ մասին հայտնում է New York Times-ը։
Մահապատժի ենթարկվածների թվում է ընտրված պատգամավոր, նախկին հիփ-հոփ արտիստ Ու Պյո Զեյա Տուն։ Չորսն էլ դատապարտվել են փակ դատավարություններով, առանց փաստաբանների ներկայության։ Նրանց մահապատիժները նույնպես տեղի են ունեցել գաղտնի։
Դատավճիռն ի կատար է ածվել երկրի ամենամեծ քաղաքի՝ Յանգոնի ծայրամասում գտնվող Մյանմայի տխրահռչակ Ինսեյն բանտում կախվելու միջոցով։ Պաշտոնապես քաղաքական գործիչները պատժվել են «դաժան և անմարդկային ահաբեկչությունների համար»։
2021 թվականի փետրվարի 1-ին Մյանմայի զինված ուժերի հրամանատարությունը հայտարարել էր արտակարգ դրություն՝ հիմնվելով 2020 թվականի նոյեմբերի խորհրդարանական ընտրությունները կեղծելու քաղաքացիական կառավարության պնդումների վրա։ Գերագույն գլխավոր հրամանատար Մին Աուն Հլեյնի զինվորները ցրել են կառավարությունը և ձերբակալել երկրի նախագահ Վին Միինին։
Նրանից բացի՝ գերեվարվել են Աուն Սան Սու Չժին, որը զբաղեցնում էր պետական խորհրդականի պաշտոնը (պաշտոնը մոտավորապես համարժեք է վարչապետին) և ԱԳՆ ղեկավարը, ինչպես նաև Հանուն Ժողովրդավարության Ազգային լիգայի այլ կողմնակիցներ։ Շուտով երկրում սկսվել են բողոքի ցույցեր՝ ի պաշտպանություն տապալված կառավարության։