ԱԺ «Հայաստան» խմբակցության պատգամավոր Արթուր Խաչատրյանն այսօր ԱԳ նախարար Արարատ Միրզոյանից հետաքրքրվեց, թե մենք ի՞նչ ձեռքբերումներ ենք ունեցել արտաքին ճակատում, եթե ունեցել ենք, իհարկե։
«Կառավարության ղեկավարը բազմաթիվ անգամներ նշել է, որ Ղարաբաղի բնակիչներն իրեն չեն ընտրել, ուստի ինքը չի կարող ներկայացնել այդ մարդկանց շահերը։ Հիմա բանակցություններ են տեղի ունենում․ Ղարաբաղի ժողովուրդն ու քաղաքական բոլոր ուժերը հայտարարում են, որ այն, ինչ դրված է օրակարգում իրենց շահերից չի բխում, իրենք համաձայն չեն որևէ կարգավիճակով վերադառնալ Ադրբեջանի կազմ։ Ուզում եմ հստակ հասկանալ՝ դուք Արցախի ժողովրդից լիազորվե՞լ եք իրենց անունից բանակցել՝ իրենց կարգավիճակի վերաբերյալ»,- հարց հնչեցրեց նա։
Ի պատասխան՝ Արարատ Միրզոյանը նշեց, որ իրենք ԼՂ ժողովրդի անունից մանդատ չեն ստացել՝ իրենց ապագան բանակցելու, և իրավունք չունեն որոշելու նրանց կարգավիճակը։
«Միակ բանը, որ մենք ուզում ենք ապահովել, այն է, որ այդ կարգավորման շրջանակում ստեղծվի բանակցությունների հարթակ՝ ԼՂ ժողովրդի և Բաքվի միջև։ Որպեսզի խաղաղությունը լինի կայուն, պետք է առկա խնդիրները հասցեագրվեն։ Պետք է քննարկվեն բոլոր հարցերը, որոնք կան հիմա ԼՂ-ում, և դրանք պետք է ներկայացվեն ԼՂ իշխանությունների կողմից։ Մենք պետք է ստեղծենք հարթակ»,- ասաց նա։
Արթուր Խաչատրյանը հետաքրքրվեց նաև Թուրքիայի հետ հարաբերությունների կարգավորման գործընթացից և Թուրքիայի նախապայմաններից։
Արձագանքելով՝ Արարատ Միրզոյանը նշեց, որ Թուրքիայի կողմից նախապայմաններ չեն առաջադրվել երբևէ։
«Նախապայմաններ չկան, և նպատակը վերջնական կարգավորումն է։ Հայոց ցեղասպանության ճանաչման գործընթացը երբևէ հարաբերությունների կարգավորման հարցում չի քննարկվել։ Օրակարգում որևէ հարց չկա»,- շեշտեց նա։
Մեկ այլ հարցի, թե ինչու էր Թուրքիայի նախագահի երդմնակալության արարողության ժամանակ Փաշինյանը երկրորդ շարքում նստած, Միրզոյանը պատասխանեց՝ դա արարողակարգային հարց է․ վարչապետները երկրորդ շարքում են նստում։
Մանրամասները՝ տեսանյութում։