Հայ-ֆրանսիական հարաբերություններն իհարկե զարգանում են, մտնում են ավելի ռազմաքաղաքական, տնտեսական գործերի մեջ, բայց հիմա դեռ կասկածներ կան և անբավարար ուշադրություն է հայ հանրությունը զգում, որը կապված է արցախյան հարցի հետ։ Այս մասին MediaHub.am-ի հետ զրույցում ասաց ֆրանսիահայ քաղաքագետ Կայծ Մինասյանը՝ խոսելով հայ-ադրբեջանական հակամարտության հանգուցալուծման գործում Ֆրանսիայի դերակատարման մասին։
«Հայերը բավարար չեն համարում միայն հայտարարություններն ու խոսքերը, զորակցությունները։ Լավ է, որ Ֆրանսիայի նախագահ Էմանուել Մակրոնն ակտիվ միջամտում է Արցախի, Հայաստանի և Ադրբեջանի միջև հարցերի լուծման գործում, բայց կարծում եմ՝ հայերն այլ բան են սպասում Ֆրանսիայից»,-ասաց նա։
Անդրադառնալով ԵԱՀԿ Մինսկի խմբի աշխատանքներին, որի համանախագահող երկիր է նաև Ֆրանսիան, վերջինս ընդգծեց, որ Մինսկի խմբի գոյությունն առհասարակ հարցականի տակ է.
«ԱՄՆ-ն էլ, Ֆրանսիան էլ շեշտն այդքան էլ Արցախի ուղղության վրա չեն դնում: Պետք է Ֆրանսիայի իշխանությանը հարցնել՝ արդյո՞ք ուզում են վերականգնել Մինսկի խմբի ֆորմատն ու էությունը։ Ֆրանսիան, իհարկե, դատապարտում է Ադրբեջանին հարձակման համար, բայց առանց հստակ մեղադրական բառերի, պարզապես ասում է՝ ադրբեջանական ուժերը պետք է հետ վերադառնան իրենց դիրքեր: Սա անուղղակիորեն նշանակում է, որ Ադրբեջանն ագրեսոր է, բայց այս բառը չեն օգտագործում։ Ֆրանսիան փորձում է հավասարությունը պահել»,-նշեց քաղաքագետը։
Մինասյանի խոսքով՝ շատ «եթե»-ներ կան, սակայն, ըստ նրա, ԱՄՆ-ի և Ֆրանսիայի համար շատ կարևոր է, որ ոտք դնեն շրջան, հետո հասկանան, թե ինչ քայլեր պետք է ձեռնարկվեն։
«Խոսելը շատ հեշտ է, բայց մինչև «տան մեջ ոտք չդնեն», Ադրբեջանին սաստել չեն կարող, քանի որ Ադրբեջանը կարող է դանդաղ, ձգձգելով իր ուզածին հասնել, խոսք տալ Մակրոնին, Բայդենին, բայց արդյունքում խոսքի տերը չմնալ»,-ընդգծեց Մինասյանը։
Խոսելով Եվրոպայից հայ-ադրբեջանական սահման այցելած դիտորդների մասին՝ քաղաքագետը շեշտեց, որ հայկական կողմն ուզում է այդ առաքելությունը երկարացնել, քանի որ միայն այս դեպքում պարզ կլինի իրականությունը։
Լիաննա Թորոսյան