Ես արդեն 4,5 տարի է դատախազության, ԱԱԾ-ի, քննչական մարմինների ուշադրության կենտրոնում եմ։ Չեմ կարող ասել, թե մամուլում տարածված լուրերն ինչ հիմք ունեն։ Հիմա էլ ՊԵԿ-ի քննչական վարչություն եմ հրավիրված, և ոչ միայն ես, նաև եղբայրս ու նրա կինը։ Նոր բան չէ, որ իշխանությանը մենք «խանգարում ենք»։

Այս մասին MediaHub.am-ի հետ զրույցում ասաց «Հայաստան» խմբակցության պատգամավոր Վահե Հակոբյանը՝ խոսելով մամուլում տարածվող այն լուրերի մասին, թե ՀՀ գլխավոր դատախազ Աննա Վարդապետյանն առաջիկայում կմիջնորդի անձեռնմխելիությունից զրկել և կալանավորել իրեն, Արմեն Չարչյանին և Սեյրան Օհանյանին։ 

«Իշխանությունն ամեն գերատեսչությունում տեղավորում է իրեն հավատարիմ մարդկանց, հենց այսպիսի գործերի համար․ Աննա Վարդապետյանի նշանակումն էլ ապացույց էր։ Հիմա Փաշինյանին ոչինչ չի խանգարում, որ շինծու մեղադրանքներ առաջադրեն իր համար անցանկալի մարդկանց նկատմամբ ու վստահ է, որ բոլոր կառույցներն օժանդակելու են իրենց անօրինություններին։ Վաղուց դարձել ենք բռնապետական երկիր, իր «բռնապետիկով»»,-ասաց նա։

Հարցին, թե կոնկրետ ինչո՞ւ է այս երեք պատգամավորների անունը շեշտվում, Հակոբյանը պատասխանեց․ 

«Գործընկերներիս մասով ոչինչ ասել չեմ կարող, բայց գիտեմ, որ ես Փաշինյանի անձնական թշնամին եմ, ինչով ես հպարտանում եմ»։ 

Ճշտող հարցին՝ մանդատից զրկելու գործընթացը որքանո՞վ է հավանական համարում այս պարագայում, պատգամավորն արձագանքեց՝ ոչինչ չի բացառում։ 

«Դե, ի՞նչ խնդիր ունեն․ դատախազը կգա, մի երկու բառ կխոսի, նրանք էլ կքվեարկեն, կզրկեն, կգնան»,-ամփոփեց նա։

Լիաննա Թորոսյան