Օրեր առաջ «Քաղաքացիական պայմանագիր» կուսակցության վարչությունը վարչության նոր կազմ ընտրեց։ Սակայն, ըստ մամուլի, վերահաշվարկ է տեղի ունեցել, որից հետո կազմում փոփոխություններ են եղել։

Մամուլը նշում է՝ վերահաշվարկից հետո ԱԺ համանուն խմբակցության ղեկավար Հայկ Կոնջորյանն ու ՀՀ փոխվարչապետ Համբարձում Մաթևոսյանը դուրս են մնացել վարչության կազմից, քանի որ պատգամավոր Արսեն Թորոսյանի ու ԱԻ նախարար Արմեն Փամբուխչյանի ստացած քվեներն ավելի շատ են եղել, որոնք էլ անցել են վարչություն։

MediaHub.am-ը տեղեկությունը փորձեց ճշտել ՔՊ-ից: Մեզ հետ զրույցում ՀՀ Պետական վերահսկողական ծառայության ղեկավար Ռոմանոս Պետրոսյանն ասաց, որ ՔՊ համաժողովի մասին պաշտոնական հաղորդագրութուն կտրվի հավուր պատշաճի։

«Այլ մեկնաբանություն չեմ կարող այս պահին տրամադրել»,-ասաց նա։

Նշենք, որ MediaHub.am-ը փորձեց տեղեկությունը հստակեցնել նաև ՔՊ մյուս ներկայացուցիչների հետ, որոնք, սակայն, զանգերն անպատասխան թողեցին, իսկ ԱԺ փոխնախագահ Ռուբեն Ռուբինյանն էլ շեշտեց՝ հարցազրույց տալ չի ուզում, հարցը լսել չի ուզում։

Հիշեցնենք, որ նորընտիր վարչության 15 հոգանոց կազմը մինչև վերջին հավանական փոփոխությունները այսպիսի տեսք ուներ՝ Նիկոլ Փաշինյան (941), Սուրեն Պապիկյան (809), Ռուբեն Ռուբինյան (613), Տիգրան Ավինյան (559), Սասուն Միքայելյան (547), Արայիկ Հարությունյան (545), Գեւորգ Պապոյան (542), Արփի Դավոյան (540), Գնել Սանոսյան (532), Վահագն Ալեքսանյան (524), Ալեն Սիմոնյան (508), Վաղարշակ Հակոբյան (462), Համբարձում Մաթեւոսյան (418), Հայկ Կոնջորյան (387) եւ Ռոմանոս Պետրոսյան (386)։ Ընտրությանը մասնակցել է 1024 պատվիրակ։

Լիաննա Թորոսյան