Պաշտոնական թղթաբանության ուսումնասիրությունը ուշագրավ փաստեր է բացահայտում: Օրինակ, MediaHub-ը առաջին անգամ չէ, որ նկատում է՝ տարբեր գործունեություն ծավալող ընկերություններ չթույլատրված նվիրատվություններ են կատարում «Քաղաքացիական պայմանագիր» կուսակցությանը և հետո դրա համար տուգանվում:

Մասնավորապես,  «Առմա Քոնսթրաքշն» ՍՊԸ-ն  վարչական տույժի է ենթարկվել ՔՊ-ին փոխանցած նվիրատվության համար։ Արդյունքում որոշվել է «Առմա Քոնսթրաքշն»-ին վարչական տույժի ենթարկել՝ նվիրատվության գումարի չափով, այն է՝ 400 հազար դրամ։

Վերոնշյալ ընկերությունը զբաղվում է շինարարական և վերանորոգման ծառայություններով։

Նման իրավիճակում է հայտնվել նաև «ՀԱԷԿ Շինարարություն» ՓԲԸ-ն, սակայն այս ընկերության դեպքում վարչական տույժի չափը կազմել է 300 հազար դրամ։

Այս կազմակերպությունը զբաղում է էներգետիկ, հիդրոտեխնիկական, արդյունաբերական, ջրային օբյեկտների շինարարությամբ: 

MediaHub-ը պաշտոնական փաստաթղթերից տեղեկացավ նաև, որ ՔՊ-ին չթույլատրված նվիրատվության կատարողներից մի քանիսի գործերը կարճվել են։ Նման օրինակ է «Արարատ» ջրօգտագործողների ընկերությունը, որը զբաղվում է ոռոգման ջրի մատակարարումով:

Ընկերությունը Նիկոլ Փաշինյանի կուսակցության բանկային հաշվին կատարել էր փոխանցում՝ հանրագումարային 121,960 դրամ։ Սակայն գործի քննության ընթացքում որոշվել է վարչական պատասխանատվությունից ընկերության տնօրենին ազատել:

Նշենք, որ MediaHub-ն ավելի վաղ գրել էր, որ «ՊԱՆՈ» ՍՊԸ-ն, որը հացաբուկեղենի արտադրամաս է, վարչական տույժի է ենթարկվել «Քաղաքացիական պայմանագիր» կուսակցությանը 300 000 դրամ նվիրատվություն կատարելու համար:                                                                                                  
Ակամայից հարց է առաջանում՝ առաջին հայացքից քաղաքականության հետ որևէ աղերս չունեցող ընկերություններն ինչո՞ւ են նման նվիրատվություններ կատարում ՔՊ-ի հաշվին:

Էմմա Մարտիրոսյան