MediaHub-ը պաշտոնական փաստաթղթերից տեղեկացավ, որ «ՊԱՆՈ» ՍՊԸ-ն վարչական տույժի է ենթարկվել «Քաղաքացիական պայմանագիր» կուսակցությանը նվիրատվություն կատարելու համար։
Ինչպես նշվում է փաստաթղթում, ստուգման արդյունքում վերապահված տվյալներից պարզ է դառնում, որ ընկերության անունից կուսակցությանը կատարվել է «Կուսակցության մասին» սահմանադրական օրենքով սահմանված չթույլատրված նվիրատվություն, այն է՝ 2023 թվականի ընթացքում կուսակցության բանկային հաշվին փոխանցում՝ 300 հազար դրամի չափով։
Խախտման հայտնաբերմամբ պայմանավորված 2024 թվականին «ՊԱՆՈ» ընկերության տնօրեն Լյուդվիգ Չոլոյանին ուղարկվել է ծանուցում՝ իրավաբանական անձի անունից կուսակցությանը նվիրատվություն կատարելու զանցանքի հատկանիշներով առևերևույթ խախտման վերաբերյալ։
Արդյունքում որոշվել է «Պանո» ՍՊԸ-ի տնօրեն Լյուդվիգ Չոլոյանին վարչական տույժի ենթարկել նվիրատվության գումարի չափով, այն է՝ 300 հազար դրամ։
MediaHub-ը փորձեց հասկանալ, թե ի՞նչ ընկերություն է, և ինչո՞ւ է տնօրենը որոշել նվիրատվություն կատարել իշխանական կուսակցությանը:
Մեզ հետ զրույցում ընկերության տնօրենի օգնականն ասաց, որ նվիրատվությունը կատարվել է բարեգործության համար։ Հարցին, թե տնօրենը որևէ առնչություն ունի՞ ՔՊ կուսակցության հետ, մեր զրուցակիցը բացասական պատասխան տվեց՝ ոչ։
«Փոխանցումը, երբ արվել է, իրավաբանի հետ չի քննարկվել, թե չէ այդ ճանապարհով փոխանցում չէինք անի»-, փորձեց արդարացնել իրենց սխալը ընկերության տնօրենի օգնականը։
Նշենք, որ «ՊԱՆՈ» ՍՊԸ-ն Երևանում գործող հացաբուլկեղենի արտադրամաս է, որը հիմնադրվել է 2013-ից։ Թե ինչո՞ւ է ՔՊ-ին փոխանցում արվել, այն էլ ոչ թե հացաբուլկեղենի տեսքով, այլ գումարային, մնում է միայն ենթադրել:
Էմմա Մարտիրոսյան