ՄԱԿ-ում Իրանի դեսպան և մշտական ներկայացուցիչ Ամիր Սաիդ Իրավանին Անվտանգության խորհրդին և ՄԱԿ-ի գլխավոր քարտուղարին ուղղված նամակում ԱՄՆ նախագահ Դոնալդ Թրամփի հայտարարությունները տագնապալի և անպատասխանատու է անվանել։
Նա ընդգծել է, որ Իրանը կտրականապես մերժում և դատապարտում է այդ «անխոհեմ սպառնալիքը»։
«Այս անխոհեմ և սադրիչ հայտարարությունները հանդիսանում են միջազգային իրավունքի և Միավորված ազգերի կազմակերպության կանոնադրության ակնհայտ խախտում, մասնավորապես 2-րդ հոդվածի 4-րդ կետը, որն ուղղակիորեն արգելում է ուժի սպառնալիքը կամ կիրառումը անկախ պետությունների դեմ»,- նշվում է փաստաթղթում։
«Բոլորը կարծում են, որ Իսրայելը մեր օգնությամբ կամ մեր հավանությամբ կռմբակոծի Իրանը: Ես կնախընտրեի, որ դա տեղի չունենա: Ես կնախընտրեի Իրանի հետ գործարքը, որը մեզ հնարավորություն կտա ստուգել իրանական միջուկային օբյեկտները, մոնիտորինգ իրականացնել»,- ավելի վաղ ասել էր ԱՄՆ նախագահ Դոնալդ Թրամփը:
Իրանի կառավարության ներկայացուցիչը հայտարարել է, որ Իրանը հրաժարվում է ԱՄՆ-ի հետ բանակցել Թրամփի՝ Թեհրանի վրա առավելագույն ճնշման հրամանի պատճառով։