Հրադադարի ռեժիմը  պահպանվում է, իրավիճակը մեր բանակը վերահսկում է։ Այս մասին MediaHub.am-ի հետ զրույցում ասաց «Ապարան» ջոկատի հրամանտար, պաշտպանության նախարարի խորհդական Ռազմիկ Պետրոսյանը, ով Ջերմուկի  դիրքերում է։ 

«Այս ճակատամարտում հայ զինվորը արժանպատիվ կռվեց, շատերը կռվեցին մինչև վերջին շունչը։ Միայն իմ ջոկատից 11 կամավորի զոհ ունենք, փառք մեր զինվորներին, կամավորներին։ Կոչ եմ անում  բանակին ստորացնող քայլեր չարվեն, կոչ եմ անում նաև ճակատագրական պահին բոլորով համախմբվենք»,-ասաց Ռազմիկ Պետրոսյանը։

Անդրադառնալով հարցին, թե Ջերմուկի դիքեր ներթափանցած ադրբեջնական խմբերն արդյոք դուրս են շպրտվել, Ռազմիկ Պետրոսյանն ասաց, որ դեռ խմբեր կան, բայց ամորֆ վիճակում են, այնտեղից գործողություններ իրականցնել չեն կարող. «մենք իրավիճակը վերահսկում ենք»  հավաստիացրեց նա։

Ռազմիկ Պետրոսյանն ասաց, որ կարևոր է, որպեսզի ողջ հասարակությունը հասկանա` բանակը, կամավորները հերոսաբար  մարտնչել են, հավատարիմ մնալով հայրենիքին ծառայելու իրենց երդմանը։

Անի Գևորգյան