Մեր այսօրվա պարտությունը հենց հոկտեմբերի 27-ն էր, որ տեղի ունեցավ նախորդ իշխանությունների օրոք։ Այդ մասին այսօր «Եռաբլուր» զինվորական պանթեոնում լրագրողների հետ զրույցում ասաց ԵԿՄ նախագահ Սասուն Միքայելյանը։

Նրա խոսքով՝ բնականաբար, այն դեռ չի բացահայտվել, բայց կբացահայտվի, այս իշխանությունը կբացահայտի։

«Մենք փոքր ազգ ենք, պարտավոր ենք բացահայտել, թե ինչ տեղի ունեցավ քսաներեք տարի առաջ»,- նշեց Միքայելյանը։

MediaHub.am-ի դիտարկմանը, որ պատմությունը եթեներ չի սիրում, բայց ի՞նչ կունենայինք, եթե այդ ոճիրը չլիներ, Սասուն Միքայելյանը պատասխանեց՝ կունանայինք Իսրայելի պես հզոր պետություն, եթե Կարեն Սերոբիչն ու Վազգեն Սարգսյանը ողջ մնային։

«Սպարապետի ժամանակ հայոց բանակը տարածաշրջանում ամենահզորն ու մարտունակն էր։ Սպարապետն այն ժամանակ կարողացավ մեզ բոլորիս համախմբել»,- ասաց Սասուն Միքայելյանը։

Սակայն նա նաև նկատեց, որ հայը հայի ձեռքով է պարտվում, դա պատմությունն է ցույց տվել. նախ, հոկտեմբերքսանյոթյան ոճիրը, ապա՝ 44-օրյայի ընթացքում եղած դավաճանությունները։

Նարե Գնունի