Եթե դիտարկենք, որ դիտորդների տեղակայումը երկամսյա ժամկետ է նախատեսվում, այս մասով առհասարակ դեռևս հստակ չէ, թե դիտորդները ինչպիսի լիազորություններով, ինչպիսի տեխնիկական միջոցներով և ինչպիսի գործիքակազմով են վերահսկողությունն իրականացնելու: Այս մասին ԱԺ ճեպազրույցների ժամանակ ասաց «Պատիվ ունեմ» խբակցության պատգամավոր Տիգրան Աբրահամյանը:
«Օրինակ՝ հիշեցնեմ, որ մինչև 2018-ի բանակցային գործընթացում 2016-ի ապրիլյան գործողություններին հետևած բանակցային փուլը, երբ այդ ժամանակ նախատեսված էր առաջնագծում դիտորդների թվի ընդլայնում, դա վերաբերում էր ԵԱԿՀ գործող ղեկավարի գրասենյակի ընդլայնմանը: Երբ խոսվում էր առաջնագծում հետաքննության մեխանիզմների ներդրման մասին, այդ ժամանակ խոսքը վերաբերում էր հատուկ տեխնիկական միջոցների ներգրավմանը, որը ենթադրում էր սահմանում ցանկացած ուղղությունից կրակի դեպքում հստակ տեխնիկական միջոցների ֆիքսում: Այդ ժամանակ պարզ էր, թե ինչ է իրենից ներկայացնում այդ ինստիտուտների ընդլայնումը կամ լիազորությունների իրացումը»,-նշեց Աբրահամյանը:
Պատգամավորը լավատեսական կարծիք չունի այժմյան դիտորդական առաքելության իրականացումից` անկախ հետևանքներից: