Խաղաղության պայմանագրում չպետք է հիշատակում լինի, որ Արցախը չի լինելու Ադրբեջանի կազմում. Սիմոնյան
Ալեն Սիմոնյանը չի կարծում, որ Հայաստանի ու Ադրբեջանի միջև կնքվելիք խաղաղության պայմանագրի մեջ պետք է որևիցէ հիշատակում լինի, որ Արցախը չի լինելու Ադրբեջանի կազմում։ Այդ մասին նա ասաց Արցախից ժամանած պատվիրակության հետ հանդիպումից հետո լրագրողների հետ զրույցում։
«Ես չեմ կարծում, որ պետք է նման հիշատակում լինի, որովհետև դա, նախևառաջ, կարող է հայելային պահանջ ու ցանկություն առաջացնել, երկրորդը՝ Հայաստանը երբևիցէ Ադրբեջանի նկատմամբ տարածքային պահանջ չի ունեցել ու տարածքների մասին շեշտումը միայն կբարդացնի ու, գուցե, առ ոչինչ կսարքի հնարավոր կնքվելիք պայմանագիրը: Իմ անձնական կարծիքն է, որ նման բան պետք չէ անել», - հայտարարեց Սիմոնյանը:
Անդրադառնալով հարցին՝ ի՞նչ է լինելու Արցախյան հարցի հետ, Սիմոնյանը կարևորեց, որ Արցախը ինքը ևս ներգրավված լինի բոլոր խոսակցություններում։
«Մենք Արցախին առաջարկում ենք, որ Ստեփանակերտն ինքնուրույն ներգրավված լինի բոլոր քննարկումների մեջ, իսկ Հայաստանը պետք է մաքսիմալ ներգրավված լինի այդ խոսակցությունների մեջ, որովհետև եղել է տարբերակ, որտեղ Հայաստանն ու Արցախը, որպես այդպիսին, առանձնացնելու տարբերակով է եղել, մենք չենք գնացել այդ տարբերակին»:
Ըստ Սիմոնյանի՝ Ադրբեջանը մշտական ուղիղ կապի մեջ է Արցախի իշխանության հետ: ԱԺ նախագահը նշեց, որ նույնիսկ լինում են դեպքեր, որ Արցախի իշխանություններն ավելի շատ են տեղեկացված լինում, քան՝ իրենք։
Մանրամասները՝ տեսանյութում
Անի Գևորգյան
