Ամերիկյան սրտաբանական ընկերակցության գիտնականների նոր հետազոտությունը ցույց է տվել, որ չիլի պղպեղի կանոնավոր գործածությունը կարող է մեկ քառորդով նվազեցնել մահվան վտանգը։ Այս մասին գրում է «ՌԻԱ Նովոստի»-ն՝ հղում անելով բրիտանական Express պարբերականին։
Հետազոտության շրջանակներում մասնագետներն ուսումնասիրել են ԱՄՆ-ի, Իտալիայի, Չինաստանի և Իրանի ավելի քան 570 հազար բնակչի սննդակարգի ու առողջության վերաբերյալ տվյալներն ու վերլուծել սննդային սովորությունների ազդեցությունը տարատեսակ հիվանդությունների զարգացման ու դրանց հետևանքով մահվան հավանականության վրա։
Պարզվել է, որ այն մարդկանց մոտ, որոնց սննդակարգում մշտապես առկա է չիլի պղպեղ, սրտանոթային հիվանդությունների հետևանքով մահվան հավանականությունը նվազում է 26 տոկոսով, իսկ քաղցկեղի հետևանքով մահվան հավանականությունը՝ 23 տոկոսով։ Ընդհանուր առմամբ՝ չիլի պղպեղի գործածության շնորհիվ կամավորների մոտ անկախ պատճառից մահվան հավանականությունը ցածր է լինում 25 տոկոսով։
Բանն այն է, որ չիլի պղպեղը հակաբորբոքային, հակաօքսիդանտային ու հակաուռուցքային ազդեցություն է ունենում, ինչպես նաև նպաստում է արյան մեջ շաքարի մակարդակի կարգավորմանը։