«Աշխարհը կանգնած է 3-րդ համաշխարհային պատերազմի շեմին։ Իհարկե՛, մենք ամեն օր լսում ենք տարբեր պետությունների հայտարարությունները, դրանք որքան տարբեր՝ նույնքան նման են։ Թվում է՝ ոչ ոք պատերազմ չի ցանկանում, բայց գործուն քայլեր ոչ ոք չի ձեռնարկում, որպեսզի այս պատերազմը չմեծացնի իր աշխարհագրությունը»,-MediaHub-ի հետ զրույցում ասաց ուկրաինացի նախկին զինվորական Նիկիտա Իվանսեչկոն։
Ռուս-ուկրաինական պատերազմի պատճառով Իվանսեչկոյի ընտանիքը բնակություն է հաստատել Գերմանիայում, սակայն ինքը շարունակում է մնալ ծննդավայր Զապորոժիե քաղաքում։
«Հավանաբար տեսել եք ատոմակայանի հրդեհը։ Դուք պատկերացնո՞ւմ եք, եթե այն չհաջողվեր մարել, ինչ կլիներ տարածաշրջանի վիճակը։ Վերջին ամիսների լռությունից հետո ռուս-ուկրաինական հակամարտությունը նոր փուլ է մտել։ Եթե սրա դեմը չառնվի, ապա այն շարունակվելու է հարևան պետություններում։ Պետք է զսպել և՛ ուկրաինական, և՛ ռուսական ուժերին։ Գերտերությունների խաղերի պատճառով մենք մարդիկ ենք կորցնում, թանկ ու հարազատ մարդիկ»,-ասաց նա։
Նախկին զինվորականը, որ երկար տարիներ ղեկավարել է ուկրաինական օդուժը, պատերազմի պայմաններում դժվարանում է պատասխանել՝ արդյո՞ք պատրաստ է կանգնել զինված ուժերի կողքին։
«Ես միայն մի բան եմ ուզում․ օր առաջ պատերազմն ավարտվի։ Ես ռուսամետ չեմ. ո՛չ Ռուսաստանի իշխանություններն են մի բան, ո՛չ էլ Ուկրաինայի ղեկավարները։ Մենք Արևմուտքի օգնությամբ հարվածում ենք Ռուսաստանին՝ պատասխան հարվածը չի ուշանում։ Արդյունքում մարդիկ են մահանում՝ խաղաղ բնակիչներ, երեխաներ»,-նշեց նա։
Նիկիտա Իվանսեչկոյի հաշվարկով, տարածաշրջանը՝ ներառյալ Կովկասը, կդառնա աշխարհի ամենաթեժ կետը։
«Ռուսաստանը՝ Ուկրաինայի հետ, Իսրայելը՝ Պաղեստինի, միաժամանակ Լիբանանի հետ։ Շուտով «քնած» հակամարտությունները կարթնանան։ Հարավային Կովկասի տարածաշրջանում որոշիչ դեր կխաղա Իրանը։ Դեռ հեռավար փոխհրաձգություն է Իրանի, Իսրայելի ու Ադրբեջանի, հույների ու թուրքերի, հայերի ու ադրբեջանցիների միջև։ Եթե բոլոր այս պետությունները չմիավորվեն ու չկանխեն ռուս-ուկրաինական այս նոր կրակի օջախը, ապա կրկնում եմ՝ 3-րդ համաշխարհային պատերազմն ու տնտեսական ճգնաժամը մեր տան շեմին է»,-հավելեց Ուկրաինայի ԶՈՒ նախկին զինվորականը։
Հունան Թադևոսյան