ԼՂ-ում շարունակում է ծավալվել ու խորանալ հումանիտար ճգնաժամը։ Այդ մասին Կառավարության այսօրվա նիստի ընթացքում ասաց Նիկոլ Փաշինյանը՝ անդրադառնալով Արցախի՝ ութ ամիս շրջափակման մեջ գտնվելուն։
Նրա խոսքով՝ ԼՂ-ում գործող խանութները, դեղատները 2022 թվականի դեկտեմբերից իրենց վաճառքի տեսականու արտաքին մատակարարում չեն ունեցել։
«Ս․թ․ հունիսի 15-ից Ադրբեջանը փակել է նաև դեպի ԼՂ հումանիտար բեռների՝ այդ թվում մանկական սննդի և դեղորայքի մատակարարումները՝ ԿԽՄԿ-ի միջոցով ևս։ ԼՂ ժողովրդին աջակցության կառավարական հանաձնաժողովը դեռևս ս․թ․ հուլիսի 26-ին դեպի ԼՂ հումանիտար բեռների տեղափոխում էր նախատեսել, բայց 19 բեռնատարներ մնացել են ճանապարհին»,- հիշեցրեց Կառավարության ղեկավարը:
Նիկոլ Փաշինյանը նկատեց՝ հումանիտար բեռների՝ ԼՂ տեղափոխման արգելքը չունի ոչ մի բացատրություն։
«Եթե մի պահ Ադրբեջանի այս գործելակերպը՝ հումանիտար բեռներ ԼՂ տեղափոխելու արգելքի վերաբերյալ, չդիտարկենք ԼՂ հայությանը ցեղասպանության ենթարկելու համատեքստում, ապա որևէ բացատրություն գտնել չենք կարող»,- նշեց նա:
Նա կարծիք հայտնեց, որ Լաչինի միջանցքի ապօրինի շրջափակման հետևանքով՝ ԼՂ-ում ստեղծված հումանիտար ճգնաժամը ծավալվել է այն աստիճանի, որ պետք է ավելի մեծ ջանքեր գործադրել ստեղծված իրավիճակին միջազգային իրավական գնահատական տալու ուղղությամբ։
«Միջազգային ամենաբարձր ատյանները ևս հայտարարել են, որ Հաագայի դատարանի որոշումը չկատարելու վերաբերյալ Ադրբեջանի մեկնաբանությունները որևէ կապ չունեն իրավականության հետ, և անհապաղ պետք է իրականացվի դատարանի որոշումը»,- ասաց Նիկոլ Փաշինյանը:
Փաշինյանի դիտարկմամբ՝ ստեղծված վիճակի լավագույն լուծումը Լաչինի միջանցքի ապօրինի արգելափակման վերացումն է և Ստեփանակերտ-Բաքու երկխոսությունը։
«Ձեռնպահ մնացեք խաղաղություն հաստատելու պատմական հնարավորությունը զրոյացնելուն ուղղված քայլերից»,- պաշտոնական Բաքվին կոչ արեց ՀՀ Կառավարության ղեկավարը։
Մանրամասները՝ տեսանյութում։