Հարավային Կորեայի վարչապետ Հան Դեոկսուն ասել է, որ ավելի թույլ ուոնը պետք է օգնի Հարավային Կորեայի տնտեսությանը՝ հավելելով, որ ակնկալում է, որ դրամավարկային քաղաքականությունը կխստացվի ավելի դանդաղ եւ ավելի փոքր չափով, քան ԱՄՆ-ում, հաղորդում է Reuters- լրատվական գործակալությունը:
«Ավելի թույլ ուոնը պետք է լավ լինի տնտեսության համար՝ արտահանման եւ ընթացիկ հաշվի տեսանկյունից, թեեւ դա որոշ չափով կբարձրացնի գնաճային ճնշումները», - հարցազրույցի ընթացքում ասել է Հան Դեոկսուն ։
Հարավային Կորեայի վարչապետը նշել է, որ փոխարժեքը շուկայական է եւ միջազգային համաձայնագրերը նշանակում են, որ միջամտությունը կարող է իրականացվել միայն կարճաժամկետ անկայունությունը մեղմելու նպատակով: Նա նշել է նաեւ, որ նման միջամտությունը պետք է լինի նվազագույն չափով եւ իրականացվի միայն անհրաժեշտության դեպքում։
ԱՄՆ-ի Ջեքսոն Հոլում կենտրոնական բանկերի կոնֆերանսի շրջանակներում Reuters-ին տված հարցազրույցի ընթացքում Կորեայի բանկի կառավարիչ Ռի Չան Յոնգն ասել է, որ Հարավային Կորեայում տոկոսադրույքները պետք է բարձրանան այնքան ժամանակ, քանի դեռ գնաճը չի թուլացել, եւ հավելել, որ կենտրոնական բանկը, հավանաբար, չի կարողանա ավելի շուտ դադարեցնել քաղաքականության խստացումը, քան ԱՄՆ Դաշնային պահուստային համակարգը։