Գերմանիայի կառավարությունը ստեղծել է հոլդինգ՝ ռուսական պետական ​​«Գազպրոմ Գերմանիա» ընկերության գերմանական մասնաճյուղի արագ ազգայնացման համար, որը Ուկրաինայում պատերազմի սկսվելուց հետո վերանվանվել է «Secureing Energy for Europe GmbH» (SEFE) եւ վերահսկվում է Դաշնային ցանցային գործակալության (Bundesnetzagentur) կողմից: Այս մասին հայտնում է գերմանական Welt am Sonntag (WaS) շաբաթաթերթը։

Լրատվականը նշել է, որ հոլդինգը կրում է գրեթե նույն անունը, ինչ SEFE-ն։ Այսպիսով, հունիսի 3-ին գրանցված, սակայն այն ժամանակ չգործող ընկերությունը վերանվանվեց Securing Energy for Europe Holding GmbH (SEEHG):

Բաժնետերերի պայմանագրում, որի տեքստը գտնվում է Welt am Sonntag-ի տրամադրության տակ, ասվում է, որ ընկերության նպատակն է ապահովել էներգամատակարարման անվտանգությունը եւ հստակեցվում, որ ընկերության գործունեության առարկան ձեռնարկություններում բաժնետոմսերի ձեռքբերումը, սեփականությունն ու կառավարումն է:

Գերմանիայի տնտեսական հարցերի եւ կլիմայի պաշտպանության նախարարությունը (BMWK) հաստատել է, որ տեղյակ է SEEHG-ի ստեղծման մասին։

Միաժամանակ նախարարության ներկայացուցիչն ընդգծել է, որ սա կանխարգելիչ միջոց է եղել՝ բացառապես գործող օրենսդրության շրջանակներում։

Մինչդեռ ավելի վաղ հայտնի էր դարձել, որ ռուսական «Գազպրոմի» նախկին «դուստրը», չնայած Գերմանիայի մեծածավալ օգնությանը, չունի բավարար միջոցներ՝ ջրի երեսին մնալու համար։ Այս մասին Der Spiegel-ին տված հարցազրույցում ասել է SEFE-ի ղեկավարը։

«Պատժամիջոցներով մենք կորցրինք ամեն ինչ՝ եւ՛ գազատարի, եւ՛ բնական հեղուկ գազի հարցում: Ներկա վիճակի համաձայն՝ ընկերության իրացվելիությունը պահպանելու համար անհրաժեշտ է 4 միլիարդ եվրոյից մի փոքր ավելի, իսկ չմատակարարված ռուսական գազի փոխարինումն ապահովելու համար՝ 5 միլիարդից մի փոքր ավելի», - նշել է նա։

SEFE-ն հույս ունի լրացուցիչ օգնություն ստանալ պետությունից այն բանից հետո, երբ Գերմանիայում հոկտեմբերի 1-ից գազի հավելավճար կսկսի գործել։ Ավելի վաղ գերմանական KfW պետական ​​բանկը SEFE-ին արդեն հատկացրել էր ռեկորդային 9,8 միլիարդ եվրո գումար։

Հիշեցնենք, որ «Գազպրոմը» ապրիլի 1-ից դադարել է վերահսկել գերմանական «դուստր» ձեռնարկությունը, ինչից հետո «Գազպրոմ Գերմանիան» անցել է Դաշնային ցանցային գործակալության վերահսկողության տակ, հայտնել է Deutsche Welle-ն։