Մարոկկոյի թագավոր Մուհամեդ VI-ը կոչ է արել իր երկրի գործընկերներին` «հստակեցնել» իրենց դիրքորոշումն Արեւմտյան Սահարայի վիճելի տարածքի վերաբերյալ եւ «միանշանակ» աջակցություն ցուցաբերել, հայտնում է AFP լրատվական գործակալությունը։
«Ես կցանկանայի հստակ ուղերձ հղել աշխարհին. Սահարայի խնդիրն այն ոսպնյակն է, որով Մարոկկոն դիտարկում է իր միջազգային միջավայրը», - ասել է նա շաբաթ երեկոյան կայացած հեռուստատեսային ելույթի ընթացքում:
Նա չի հստակեցրել, թե որ երկրների մասին է խոսքը, սակայն ողջունել է ԱՄՆ-ի «անհերքելի» դիրքորոշումը։ Նա վերոնշյալ հարցն անվանել է Մարոկկոյի եւ նրա գործընկերների միջեւ «բարեկամական հարաբերությունների անկեղծության հստակ եւ պարզ չափանիշ»:
Ռաբաթը վերահսկում է Արեւմտյան Սահարայի մեծ մասը, որը նա համարում է իր տարածքը։
Մարոկկոն 15 տարի պատերազմ է մղել Պոլիսարիո ճակատի անկախության շարժման հետ այն բանից հետո, երբ 1975 թվականին Իսպանիան դուրս է եկել իր նախկին գաղութից:
Հրադադարի վերաբերյալ ՄԱԿ-ի կողմից վերահսկվող համաձայնագիրը կոչ էր անում հանրաքվե անցկացնել, սակայն Մարոկկոն այդ ժամանակվանից ի վեր մերժել է ցանկացած քվեարկություն, որի շրջանակում կարող է թվեարկվել անկախությունը՝ առաջարկելով միայն սահմանափակ ինքնավարություն:
ԱՄՆ-ի նախկին նախագահ Դոնալդ Թրամփի օրոք ԱՄՆ-ը ճանաչել է Մարոկկոյի ինքնիշխանությունը վիճելի նախկին իսպանական գաղութի նկատմամբ, քաղաքականություն, որը շարունակվել է նրա իրավահաջորդ Ջո Բայդենի օրոք։
Թագավորը նաեւ բարձր է գնահատել, այս տարածքի ինքնավարության համար Ռաբաթի նախաձեռնած քայլերը ճանաչելու Իսպանիայի եւ Գերմանիայի վերջին քայլերը։
Ամիսներ տեւած դիվանագիտական վեճերից հետո Իսպանիան մարտին հրապարակավ պաշտպանել է, վիճելի տարածաշրջանի համար, Մարոկկոյի ինքնավարության ծրագիրը: Ինչ վերաբերում է Ռաբաթին ու Բեռլինին, ապա, մեկ տարվա դիվանագիտական սառեցումից հետո, փետրվարին պայմանավորվել են վերականգնել հարաբերությունները: