Չեմ հավատում, որ այս իշխանության օրոք իրական մեղավորները մահապատժի ենթարկվեն․ խարդախ քայլ է։ Այս մասին այսօր MediaHub.am-ի հետ զրույցում ասաց ՀՀ մարդու իրավունքների առաջին պաշտպան, հասարակական գործիչ Լարիսա Ալավերդյանը` խոսելով ՀՀ գլխավոր դատախազ Արթուր Դավթյանի առաջարկի մասին։ 

Հիշեցնենք, որ ՀՀ գլխավոր դատախազի պաշտոնին հրաժեշտ տվող Արթուր Դավթյանը գրությամբ դիմել էր ՀՀ սահմանադրական բարեփոխումների խորհրդի նախագահ, ՀՀ արդարադատության նախարար Կարեն Անդրեասյանին՝ առաջարկելով պետական դավաճանություն կատարելու համար մահապատժի ենթարկելու սահմանադրաիրավական հիմքեր ստեղծել։ Առաջարկը մեծ հնչեղություն ստացավ:

Ալավերդյանի խոսքով՝ սա շատ տարածված, ընդունված նորմ է, սակայն ըստ նրա՝ պետք է առաջարկն առաջին հերթին քննարկվի հանրության հետ։ Հարցին, թե ի՞նչ արձագանքի պետք է սպասել հանրությունից 44-օրյա պատերազմից հետո, վերջինս պատասխանեց․ 

«Հանրությունն այնպիսի բզկտված վիճակում է, այնպիսի խայտառակ տեխնոլոգիաներ են օգտագործվում ժողովրդին մանիպուլյացիայի ենթարկելու համար, որ պատկերացրեք՝ կդժվարանամ այդպիսի պարզ հարցին պատասխանել։ Կարծում եմ, որ հասարակության մեջ կա ստվար զանգված, որը կհամաձայնի այս առաջարկին, բայց կասկածում եմ, որ մեծ տոկոս կկազմի»,- ասաց նա։

Դիտարկմանը, թե սա գուցե իշխանության հերթական գործիքն է անցանկալի մարդկանց ճանապարհից հեռացնելու համար՝ Ալավերդյանը համաձայնեց․

«Այո, սրա հետ 100 տոկոս համաձայն եմ։ Այս իշխանությունները, եթե որևէ կոշտ որոշում են ընդունում, դա անպայմանորեն և բացարձակապես ընդդիմադիր ուժերի դեմ է կիրառվում։ Այստեղ է իմ կասկածամտությունը, որ հստակ չեմ կարող ասել՝ գաղափարը լավն է, թե ոչ»։Ալավերդյանի կարծիքով՝ սա ոչ թե պոպուլիստական քայլ է, այլ Դավթյանը վերջին ծառայությունն է մատուցում իշխանություններին։ «Իր անվտանգությունն ապահովելու համար վերջին ծառայություններն է մատուցում։ Իշխանության համար անցանկալի մարդկանց ձերբակալությունների շարքը շարունակվելու է, հետո դատարանով կապացուցեն, որ դավաճաններ են ու կոչնչացնեն բոլոր այն մարդկանց, որոնք պայքարել են հաղթանակած Արցախ տեսնելու համար»։ 

Լիաննա Թորոսյան