Աֆրիկյան խոշորագույն Ethiopian Airlines ավիաընկերությունը հայտարարել է, որ աշխատանքից ժամանակավորապես հեռացրել է երկու օդաչուների, որոնք, ինչպես հաղորդվում է, քնել են եւ չեն կարողացել վայրէջք կատարել Խարտում-Ադիս Աբեբա չվերթի ժամանակ։

Չվերթներին հետեւող FlightAware կայքի տվյալներով՝ ինքնաթիռը երկուշաբթի օրը դուրս է եկել Եթովպիայի մայրաքաղաքի Բոլ միջազգային օդանավակայանի թռիչքուղուց, որից հետո անվտանգ վայրէջք է կատարել:

The Aviation Herald անկախ կայքը հայտնել է, որ օդաչուները թռիչքի ժամանակ քնել են եւ արթնացել են միայն ազդանշանից, որը գործարկվել է, երբ անջատվել է ավտոմատ օդաչուի ռեժիմը։

Թռիչքի տվյալները ցույց են տվել, որ ինքնաթիռը երկիր է վերադարձել 25 րոպե անց:

Ուրբաթ օրը Ethiopian Airlines-ը հայտնել է, որ ET343 չվերթը ժամանակավորապես կորցրել է կապը օդային երթեւեկության կառավարման հետ, սակայն դրա վերականգնումից հետո բարեհաջող վայրէջք է կատարել:

«Համապատասխան անձնակազմը հեռացվել է աշխատանքից՝ մինչեւ հետագա հետաքննություն»,- ասվում է ավիաընկերության հայտարարության մեջ, որտեղ չի նշվում, թե քնած են եղել արդյոք օդաչուները:

Երկու մայրաքաղաքների միջեւ թռիչքը սովորաբար տեւում է երկու ժամից պակաս:

Լոնդոնում բնակվող ավիացիոն վերլուծաբան Ալեքս Մաչերասը միջադեպն անվանել է «խորապես տագնապալի»՝ մեղադրելով համատարած հոգնածությունը, որը լուրջ սպառնալիք է թռիչքների անվտանգության համար:

«Օդաչուների հոգնածությունը նորություն չէ եւ շարունակում է հանդիսանալ ավիացիոն անվտանգության ամենամեծ սպառնալիքներից մեկը՝ միջազգային մակարդակով»,- գրել է նա Twitter-ում:

2019 թվականի մարտին Ethiopian Airlines-ի Boeing 737 MAX ինքնաթիռը թռիչքից վեց րոպե անց վթարի է ենթարկվել Ադիս Աբեբա քաղաքից հարավ-արեւելք գտնվող դաշտում, ինչի հետեւանքով զոհվել են ինքնաթիռում գտնվող բոլոր 157 մարդիկ:

Վթարը, որը տեղի է ունեցել Ինդոնեզիայում նմանատիպ վթարից հինգ ամիս անց, պատճառ է դարձել, որ օդանավը 20 ամիս չթռչի ամբողջ աշխարհում, որից հետո նա 2020 թվականի վերջին վերսկսել է թռիչքները:

Ethiopian Airlines-ը, որը 100 տոկոսով պետությանն է պատկանում, հայտնել է 3,51 միլիարդ դոլարի շրջանառության մասին՝ 2020-2021 ֆինանսական տարվա համար: