ԱԽ քարտուղար Արմեն Գրիգորյանը սեպտեմբերի 26-ից գտնվելու է Ամերիկայի Միացյալ Նահանգների մայրաքաղաք Վաշինգտոնում: Այցի շրջանակներում ԱԽ քարտուղարն ունենալու է մի շարք աշխատանքային հանդիպումներ:
ՔՊ-ականները կրկին սկսել են «գեոպոլիտիկ զբոսաշրջությունը»՝ ԱԽ քարտուղար են գործուղում ԱՄՆ, իսկ Նիկոլ Փաշինյանը հանդիպում է Ֆրանսիայի նախագահի հետ: ՔՊ-ն ցանկանում է Արևմուտքին մեսիջ հղել, որ ՀՀ-ն պատրաստ է իր արտաքին քաղաքականության մեջ 180 աստիճանով շրջվել դեպի Արևմուտք:
ՌԴ-ի կոշտ արձագանքը չի ուշանալու, սակայն այդ արձագանքի հետևանքները ցավոք զգալու են ՀՀ բոլոր քաղաքացիները: ՔՊ-ն «ռուսական ռուլետկա» է խաղում հայկական ազգային, պետական շահերի հաշվին. նրանք ցանկանում են հակառուս երևալ Արևմուտքում, իսկ Մոսկվայում՝ ռուսամետ: Արևմուտքն ու ՌԴ-ն այսօր գտնվում են պատերազմական վիճակում, ուկրաինական թատերաբեմում բախվում են Արևմուտքի և ՌԴ-ի շահերը՝ հազարավոր զինվորներ են զոհվում, ՌԴ-ն գտնվում է բավականին բարդ գեոպոլիտիկ իրավիճակում:
Այս ֆոնին ՌԴ-ի դաշնակից ՀՀ-ի պաշտոնյաների այցերը Միացյալ Նահանգներ և Ֆրանսիա, եթե դրանք չեն հանգեցնելու հայկական բանակի համար նոր զենքերի մատակարարումներին, անիմաստ են և միայն վատթարացնելու են հայ-ռուսական դաշնակցային կապերն ու այդ հանգամանքից օգտվելու է Ադրբեջանը՝ ապակայունացնելով սահմաններն ու սկսելով նոր լայնածավալ պատերազմ:
ՔՊ-ն փորձում է միաժամանակ նստել «երկու աթոռների» վրա՝ լավ հարաբերություններ ունենալ և՛ Արևմուտքի, և՛ ՌԴ-ի հետ, սակայն գեոպոլիտիկ իրավիճակն աշխարհում դա թույլ չի տա:
Վահրամ Բագրատյան