Մեր ինքնորոշման իրավունքն արդեն իրացված է և Ադրբեջանի կազմում լինելու, Ադրբեջանի շրջան դառնալու մասին խոսք չի կարող գնալ։ Այս մասին այսօր MediaHub.am-ի հետ զրույցում ասաց Արցախի ԱԺ «Ազատ Հայրենիք-ՔՄԴ» խմբակցության ղեկավար Արթուր Հարությունյանը։
Հիշեցնենք, որ Փաշինյան-Միշել-Ալիև հանդիպման ընթացքում չի կիրառվել «Լեռնային Ղարաբաղ» եզրույթը և Բրյուսելյան հայտարարության մեջ նշված է պարզապես «Ղարաբաղի շրջան» և փորձագետները սա մեկնաբանում եմ որպես Արցախի կարգավիճակի մասին մոռանալու քայլեր։ Հարությունյանը նշեց, որ այսօր ԱՀ ԱԺ-ն առաջիկա ժամերին հայտարարությամբ հանդես կգա և կներկայացնի դիրքորոշումը վերջին շրջանում քննարկվող խնդիրների մասին։
Հիշեցնենք, որ Բրյուսելում տեղի է ունեցել Հայաստանի Հանրապետության վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի Հանրապետության նախագահ Իլհամ Ալիևի եռակողմ հանդիպումը։
Քննարկման արդյունքում պայմանավորվածություններ են ձեռք բերվել տարածաշրջանային կոմունիկացիաների բացմանն ուղղված աշխատանքների հետագա ընթացքի, սահմանների սահմանագծման ու անվտանգության հարցերով հանձնաժողովի աշխատանքների մեկնարկի վերաբերյալ:
«Ամեն դեպքում, մենք չենք շեղվում ապրիլի 14-ի արտահերթ նիստի հայտարարությունից։ Մենք ինքնորոշման իրավունքի սկզբունքներով ենք առաջ գնում։ Միշելի հայտարարության մեջ խոսվում է «Ղարաբաղի շրջանում էթնիկ հայ բնակչության իրավունքների ու անվտանգության» մասին, ես չգիտեմ, թե նրանք ինչ են ուզում ասել դրանով, բայց մենք մեր դիրքորոշումը հստակ հայտնել ենք և այդ դիրքորոշումից որևէ շեղում չի լինելու»,- ասաց նա։
Դիտարկմանը, թե ամեն դեպքում՝ բանակցություններին, հանդիպումներին Նիկոլ Փաշինյանն է գնում, որին հաջորդում է Ստեփանակերտի այն հայտարարությունները, թե իրենք են կարգավիճակի, ինքնորոշման մասով որոշողը՝ Հարությունյանն արձագանքեց՝ Արցախի ժողովուրդը 1991 թվականին իրացրել է ազգերի ինքնորոշման սկզբունքի իր իրավունքը։
«Եթե միջազգային հանրությունն այլ մոտեցումներ է ցուցաբերում՝ չի նշանակում, որ սա միանշանակ է Արցախի համար։ Արցախի ժողովրդի կարծիքը պետք է հաշվի առնել»,- ընդգծեց Հարությունյանը։
Լիաննա Թորոսյան