Թրամփը բանակցություններ է սկսել 3 երկրների հետ՝ իր սահմանած համաշխարհային մաքսատուրքերը մեղմելու համար

ԱՄՆ նախագահ Դոնալդ Թրամփը Վիետնամի, Հնդկաստանի և Իսրայելի ներկայացուցիչների հետ քննարկել է առևտրային համաձայնագրերի կնքման հնարավորությունը:

Կարող են նվազեցվել նրանց վրա հայտարարված արտահանման մաքսատուրքերը, հայտնել է CNN-ը՝ հղում անելով աղբյուրի։

Ըստ Axios-ի՝ Իսրայելի վարչապետ Բենիամին Նեթանյահուն ծրագրում է հանդիպել Թրամփի հետ երկուշաբթի՝ ապրիլի 7-ին Սպիտակ տանը՝ «փորձելու բանակցել մաքսատուրքերը վերացնելու գործարքի շուրջ»։ Իսրայելի համար դրանք կազմել են 17%։

Երկիրը փորձեց խուսափել ԱՄՆ նոր միջոցներից՝ հայտարարելով, որ կհրաժարվի ամերիկյան ապրանքների բոլոր մաքսատուրքերից, սակայն «դա չստացվեց», նշում է թերթը։

Ամերիկայի նախագահը ապրիլի 2-ին մաքսատուրքեր է սահմանել 211 երկրների և տարածքների ապրանքների վրա։ Առանձին պետությունների համար դրանք կհասնեն 50%-ի, Վիետնամի համար՝ 46%-ի, Հնդկաստանի համար՝ 26%-ի։ Թրամփն այս որոշումը հիմնավորել է ԱՄՆ տնտեսությունը վերականգնելու անհրաժեշտությամբ և տուրքերի ներդրումն անվանել «տնտեսական անկախության հռչակագիր»։