Փաշինյանի դեպքում պարզ չի, իսկ Սիմոնյանի դեպքում հստակ է՝ Արցախից որևէ հրավեր չի եղել

Արդյոք Հայաստանի իշխանական վերնախավը կկոտրի պատերազմից հետո ձևավորած պրակտիկան և կմեկնի հայկական երկրորդ պետություն՝ Արցախ, սեպտեմբերի 2-ին հանրապետության Անկախության օրը նշելու. հարցի պատասխանը մինչ այս պահը հստակ չէ։ 

Այսպես, Mediahub-ի հարցմանը, թե արդյոք Նիկոլ Փաշինյանը այս տարի կմեկնի Արցախ, թե ինչպես 2021-ին էր դարձյալ չի լինի Ստեփանակերտում, պատասխան ստացվեց՝ ժամանակին կիմանաք։ Թե ե՞րբ է այդ ժամանակը, ստացվեց գրեթե նույն պատասխանը՝ դա էլ ժամանակին կիմանաք։ Վարչապետի աշխատակազմի տեղեկատվության և հասարակայնության հետ կապերի վարչության պետ Արմեն Խաչատրյանը, թերևս, այդպես է պնդում։ 

«Վարչապետի բոլոր այցերի մասին մենք ժամանակին հաղորդագրություն ենք տարածում: Ժամանակին ամեն բան կիմանաք»,- ասաց Արմեն Խաչատրյանը։ 

Եվ ամենահուշագրավ պատասխանը. «Ես չգիտեմ՝ վարչապետն Արցախից պաշտոնական հրավեր ստացել է, թե՝ ոչ»,- նշեց նա։ 

Եթե Փաշինյանի աշխատակազմում չգիտեն՝ վերջինս հրավեր ստացե՞լ է Արցախից,  թե ոչ, ապա ԱԺ նախագահ Ալեն Սիմոնյանի դեպքում ամեն բան հստակ է․ նա հրավեր չի ստացել։ 

«Ալեն Սիմոնյանն Արցախից հրավեր չի ստացել՝ մասնակցելու Արցախի Հանրապետության հռչակման օրվան նվիրված միջոցառմանը»,- մեզ հետ զրույցում ասաց Սիմոնյանի մամուլի խոսնակ Ծովինար Խաչատրյանը։ 

Հարցին, թե Սիմոնյանն, այնուամենայնիվ, չի՞ մեկնի Արցախ, պարտադիր պետք է հրավե՞ր լինի, Խաչատրյանը պատասխանեց՝ չգիտի, թե Սիմոնյանն ինչ է որոշելու։ Հիշեցնենք, որ նախորդ տարի նույն միջոցառումների շրջանակում իշխանական վերնախավից Արցախ էին մեկնել միայն ՔՊ-ական մի քանի պատգամավորներ, որոնք հայկական երկրորդ պետությունում թիկնապահներով էին շրջում։ Ինչ վերաբերում է Նիկոլ Փաշինյանին և Ալեն Սիմոնյանին, ապա նրանք նոյեմբերի 9-ի հայտարարությունից հետո ոչ մի անգամ պաշտոնական այց չեն կատարել Արցախ։

Ի դեպ, Փաշինյանը նաև պատերազմի տարում՝ 2020 թվականի սեպտեմբերի 2-ին չի եղել Ստեփանակերտում: Պաշտոնական տեղեկատվության համաձայն, պատերազմից առաջ վերջին անգամ Փաշինյանը Ստեփանակերտում եղել է օգոստոսի 29-ին, երբ տեղի է ունեցել իր ԱՀ նախագահ Արայիկ Հարությունյանի առանձնազրույցը:

Նարե Գնունի