«Հրապարակ» թերթը գրում է.
Երեկ ԱԺ տնտեսական հարցերի մշտական հանձնաժողովը փակ քննարկում է ունեցել՝ փոխվարչապետ Մհեր Գրիգորյանի եւ առողջապահության նախարար Անահիտ Ավանեսյանի մասնակցությամբ։ Քննարկման օրակարգում եղել է արտադրական կանեփի թեման։
ՔՊ-ական պատգամավորները կառավարության անդամներից պահանջել են օրենքով մեղմացնող գործիքակազմ ներդնել, որպեսզի Հայաստանում կանեփի արտադրությամբ ընդամենը մեկ կազմակերպություն չզբաղվի։ Դեռեւս ապրիլին խորհրդարանն առաջին ընթերցմամբ ընդունեց ոլորտին վերաբերող՝ «Թմրամիջոցների եւ հոգեմետ (հոգեներգործուն) նյութերի մասին» եւ «Վարչական իրավախախտումների վերաբերյալ ՀՀ օրենսգրքում փոփոխություններ կատարելու մասին» փոփոխությունների նախագիծ, որով առաջարկվում էր արտադրական կանեփի արտադրության, ներմուծման, արտահանման, մեծածախ առեւտրի գործունեության իրականացման համար ներկայացվող փաստաթղթերի ցանկում առկա բիզնես ծրագիր ներկայացնելու պահանջից հրաժարում, ինչպես նաեւ այլ փոփոխություններ: Սակայն մայիսի 17-ին, երբ նախագիծը խորհրդարանի պատկան հանձնաժողովում քննվելուց հետո պետք է երկրորդ ընթերցման ներկայացվեր, ՔՊ-ականներն այն չընդունեցին։ Տնտեսական հարցերի մշտական հանձնաժողովի նախագահի տեղակալ Բաբկեն Թունյանը հայտարարեց, որ նման եկամտաբեր եւ գրավիչ բիզնեսով այսօր ՀՀ-ում զբաղվում է ընդամենը մեկ ընկերություն, այն էլ՝ կիսատ-պռատ, ուստի անհրաժեշտ է նոր գործիքակազմ ներդնել։
Մեր տեղեկություններով՝ ՔՊ-ականները երեկ Մհեր Գրիգորյանին են ներկայացրել իրենց առաջարկները եւ փաստարկել, որ դրանց ընդունմամբ ոլորտը կազատականացվի, եւ ոչ թե մեկ-երկու հոգի կզբաղվեն կանեփի արտադրությամբ, այլ՝ շատերը, ուստի բիզնես պլանի պահանջն էլ պետք է լինի պարտադիր, որն առողջապահության նախարարությունն առաջարկում էր հանել։ Մհեր Գրիգորյանը, մեծ հաշվով, առարկություններ չի ունեցել, ի տարբերություն առողջապահության ոլորտի պատասխանատուների։
Հիշեցնենք․ 2021-ի հունիսին «Թմրամիջոցների եւ հոգեմետ (հոգեներգործուն) նյութերի մասին» օրենքում կատարված փոփոխությունների արդյունքում Հայաստանում արտադրական կանեփի արտադրությունը, ներմուծումը, արտահանումն ու մեծածախ առեւտուրը սահմանվեցին որպես լիցենզավորման գործունեության տեսակ: Օրենքի փոփոխությունը 2 տարի առաջ հիմնավորվում էր միլիոնավոր դոլարների շրջանառությամբ ու մեծ եկամուտներով։ Ուշագրավ է, որ Հայաստանում կանեփի արտադրությամբ զբաղվող միակ ընկերության անունը կապվում է Երեւանի ապագա քաղաքապետ, ՔՊ-ի քաղաքապետի թեկնածու Տիգրան Ավինյանի հետ, մամուլում այդ մասին հրապարակումներ կան։ ՔՊ-ականները կարծում են, որ ԱԺ-ի կտրուկ շրջադարձը՝ այս նախագծի հարցում, առաջին ընթերցումից հետո պայմանավորված է հենց Ավինյանի գործոնով, Փաշինյանը որոշել է մեղմացնել այս բիզնեսի չափանիշները, որ մեծ թվով խաղացողներ մտնեն այդ դաշտը։
Ամբողջական հոդվածը կարող եք կարդալ թերթի այսօրվա համարում