Պարենային ապրանքների համաշխարհային գներն աճում են ոչ թե Ուկրաինայում Ռուսաստանի Դաշնության ռազմական հատուկ գործողության, այլ Արևմուտքի պատժամիջոցների հետևանքով։ Այս մասին շաբաթ օրը Telegram-ի իր ալիքում գրել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Գերմանիայի արտաքին գործերի նախարար Աննալենա Բերբոքի խոսքերն այն մասին, որ Ուկրաինայում ստեղծված իրավիճակի պատճառով կարող է համաշխարհային սով առաջանալ։
«Գները աճում են Միացյալ Նահանգների ճնշման ներքո կոլեկտիվ՝ Արևմուտքի կողմից կիրառվող պատժամիջոցների պատճառով: Սա եթե խոսենք ուղղակի պատճառի մասին: Սա չհասկանալը կամ հիմարության կամ հասարակության միտումնավոր մոլորության նշան է», – ասել է Զախարովան:
Դիվանագետի խոսքով՝ Ուկրաինայի պետականության փլուզումը նույնպես Արևմուտքի գործն է։ «Դրանում ներգրավված են նաև տիկին Բերբոքի նախորդները, ովքեր ոչ միայն միջամտել են, այլև իրենց ձեռքով մոդելավորել են Ուկրաինայի ներքին և արտաքին քաղաքականությունը»,- ընդգծել է նա։