Միացյալ Նահանգների իշխանությունները երեքշաբթի օրը պաշտոնական մեղադրանքներ են առաջադրել ՀԱՄԱՍ խմբավորման ներկայիս առաջնորդ (ԱՄՆ-ում և ԵՄ-ում ահաբեկչական ճանաչված) Յահյա Սինվարի և ՀԱՄԱՍ-ի հինգ այլ բարձրաստիճան գործիչների (նրանցից ոմանք արդեն մահացած են):
Նիանք մեղադրվում են ահաբեկչության և ԱՄՆ քաղաքացիների սպանության դավադրության համար։
Մեղադրական եզրակացությունը հրապարակվել է երեքշաբթի օրը ԱՄՆ արդարադատության նախարարության կողմից և ուղարկվել Նյու Յորքի դաշնային դատարան։ Քրեական գործը նախաձեռվել է հոկտեմբերի 7-ին Իսրայելի վրա ՀԱՄԱՍ-ի հարձակումից և այդ հարձակման հետևանքով ԱՄՆ առնվազն 43 քաղաքացիների մահվանից հետո։
Պաղեստինյան խմբավորման առաջնորդները մեղադրվում են, ի թիվս այլ բաների, «ահաբեկչության և բռնության լայնածավալ արշավ կազմակերպելու և աջակցելու համար, որը գագաթնակետին հասավ հոկտեմբերի 7-ի սպանդով»։
Բացի Սինվարից, մեղադրանքներ են առաջադրվել ՀԱՄԱՍ-ի սփյուռքի գրասենյակի ղեկավար Խալեդ Մաշաալին և ՀԱՄԱՍ-ի արտաքին հարաբերությունների կոմիտեի ղեկավար Ալի Բարաքիին: Այս տարվա ընթացքում սպանվել են ևս երեք մեղադրյալներ՝ ՀԱՄԱՍ-ի քաղբյուրոյի նախկին ղեկավար Իսմայիլ Հանիեն, կազմակերպության ռազմական թևի նախկին ղեկավար Մուհամմեդ Դեյֆը և նրա նախկին տեղակալ Մարվան Իսան։ Իսրայելը ստանձնել է Դեյֆի և Իսայի սպանության պատասխանատվությունը և պաշտոնապես չի մեկնաբանել Թեհրանում Հանիեի մահը։