Անկարայում ավարտվել են Թուրքիայի նախագահ Ռեջեփ Թայիփ Էրդողանի և Սիրիայի նախագահ Ահմեդ ալ-Շարաայի բանակցությունները։

Բանակցությունների ավարտից հետո նախագահները հանդես են եկել համատեղ մամուլի ասուլիսում։

Նախագահ Էրդողանն իր ելույթում նշել է, որ «Թուրքիան ամենահուսահատ ու դժվարին օրերին չի թողել սիրիացի ժողովրդին անախորժությունների մեջ», և «Անկարան նոր ժամանակաշրջանում նրանց կտրամադրի անհրաժեշտ աջակցությունը»։

Նրա խոսքով՝ հարեւան Սիրիայի նկատմամբ «Թուրքիայի քաղաքականության հիմքը միշտ եղել է այս երկրի տարածքային ամբողջականության ու միասնության պահպանումը»։

Էրդողանն ասել է, որ կողմերը քննարկել են համատեղ քայլերը, որոնք կարող են ձեռնարկվել Սիրիայում «անվտանգության և տնտեսական» կայունության հաստատման համար։

«Գործելով համերաշխ՝ մենք մեր ընդհանուր աշխարհագրությունը կվերածենք խաղաղության և վստահության տարածաշրջանի՝ առանց ահաբեկչության»,- ընդգծել է Թուրքիայի նախագահը։

Նա իր պատրաստակամությունն է հայտնել Սիրիային անհրաժեշտ աջակցություն ցուցաբերել «ահաբեկչության բոլոր ձևերի դեմ պայքարում՝ լինի դա ԴԱԻՇ, թե Քրդական բանվորական կուսակցություն»։

Էրդողանն ասել է, որ «Թուրքիան պատրաստ է աջակցել Սիրիայի ավերված քաղաքների վերականգնմանը, և քանի որ տնտեսական զարգացումն արագանում է, բնակչության կամավոր վերադարձը նույնպես մեծ թափ կստանա»։

Սիրիայի նախագահ Ահմեդ ալ-Շարաան «երախտագիտություն է հայտնել Թուրքիայի կառավարությանն ու ժողովրդին՝ վարչակարգի տակ պայքարի տարիների ընթացքում ցուցաբերած աջակցության համար»։ Նա վստահեցրել է, որ «Սիրիայի և Թուրքիայի հարաբերությունները նոր մակարդակի կբարձրացվեն»։

«Մենք պատրաստ ենք Թուրքիայի հետ մեր հարաբերությունները վերածել խորը ռազմավարական համագործակցության»,- ասել է Շարաան։

Սիրիայի նախագահը «Իսրայելի օկուպացիայի տակ ներքո» երկրի տարածքների վերաբերյալ կոչ է արել միջազգային հանրությանը ճնշում գործադրել Իսրայելի վրա։

«Միջազգային հանրությունը պետք է ճնշում գործադրի Իսրայելի վրա, անհրաժեշտ է վերադառնալ 1974 թվականի սահմաններին»,- ասել է Ահմեդ ալ-Շարաան։

Էրդողանը նախագահական ինքնաթիռ է ուղարկել Սիրիայի նոր առաջնորդին վերցնելու համար։

Թուրքական Yeni Şafak թերթը գրել է, որ Ահմեդ Ալ-Շարաան Անկարա է ժամանել նախագահական ինքնաթիռով, որն Էրդողանը որպես բարի կամքի ժեստ ուղարկել է Դամասկոս։