ԱՄՆ նախագահ Դոնալդ Թրամփը հյուրընկալել է առաջին օտարերկրյա գործընկերոջը։
Իսրայելի վարչապետ Բենիամին Նեթանյահուն ժամանել է Սպիտակ տուն։
Թրամփը Նեթանյահուի հետ մամուլի ասուլիսի ժամանակ հայտարարել է, որ Գազայի բնակիչները պետք է վերաբնակեցվեն այլ երկրներ, «Միացյալ Նահանգները վերահսկողության տակ կվերցնի Գազայի հատվածը և կմաքրի այն թունելներից»:
ԱՄՆ նախագահը կարծում է, որ Գազայի հատվածն ամբողջությամբ պետք է քանդվի, իսկ բնակիչները վերաբնակեցվեն այլ երկրներ, սակայն Վաշինգտոնը մտադիր չէ ֆինանսավորել նրանց նոր բնակարանները։
«Ես ուզում եմ, որ Հորդանանն ու Եգիպտոսը պաղեստինցիներին ընդունեն: Գազայի հատվածի բնակիչները այլ ելք չունեն, քան հեռանալը, բայց ես պարտադիր չէ, որ աջակցեմ այնտեղ իսրայելական բնակավայրերին»,- ասել է նա:
«Իսրայելն աջակցում է Գազայի ապագայի վերաբերյալ Թրամփի առաջարկներին»,- ասել է Նեթանյահուն։
ԱՄՆ նախագահ Դոնալդ Թրամփը նաև հայտարարել է, որ արժանի է Խաղաղության Նոբելյան մրցանակի։ «Նրանք երբեք ինձ չեն տա Խաղաղության Նոբելյան մրցանակը, ես արժանի եմ դրան, բայց նրանք երբեք չեն տա այն ինձ», - ասել է Թրամփը Սպիտակ տանը Իսրայելի վարչապետ Բենիամին Նեթանյահուի հետ հանդիպման ժամանակ:
ՀԱՄԱՍ-ը վրդովվել է ամերիկացի առաջնորդի հայտարարություններից. «Մենք մերժում ենք Թրամփի հայտարարությունները Գազայից պաղեստինցիներին վտարելու վերաբերյալ: Ամերիկյան հայտարարությունները ռասիստական են և արտացոլում են բարոյական և մարդասիրական չափանիշների բացակայությունը»:
«Վերակառուցման գործընթացը կարող է տեղի ունենալ, քանի դեռ Գազայի բնակիչները մնում են»,- ասել է Գազայում ՀԱՄԱՍ-ի ներկայացուցիչ Հազեմ Քասեմը։