«Այսօր մենք հարգում ենք Մեծ Եղեռնի զոհերի հիշատակը»․ Թրամփն իր ուղերձում չի օգտագործել Ցեղասպանություն եզրույթը

ԱՄՆ նախագահ Դոնալդ Թրամփը ուղերձ է հղել Հայոց Ցեղասպանության 110-րդ տարելիցի կապակցությամբ։

Թրամփը չի օգտագործել «Ցեղասպանություն» եզրույթը,  լատինատառ նշել է՝ «Meds Yeghern» (Մեծ Եղեռն)։

«Այսօր մենք հարգում ենք Մեծ Եղեռնի և նրանց հիշատակը, ովքեր տուժել են 20-րդ դարի ամենասարսափելի ողբերգություններից մեկի ժամանակ: 1915 թվականից սկսած՝  1,5 միլիոն հայեր աքսորվեցին և մահացան՝ Օսմանյան կայսրության վերջին տարիներին: Հիշատակի այս օրը մենք կրկին միանում ենք Ամերիկայի և ամբողջ աշխարհի հայկական մեծ համայնքին՝ սգալով կորսված բազմաթիվ կյանքերի համար»,- նշել է Թրամփն իր ուղերձում։

Թրամփը նշել է նաև, որ ԱՄՆ-ում բնակություն հաստատած հայերը մեծ ներդրում են ունեցել  Միացյալ Նահանգների կյանքում։

ԱՄՆ նախագահն իր ուղերձի վերջում նշել է, որ «սպասում է» Հայաստանի հետ ռազմավարական գործընկերության շարունակությանը։