Ժամեր առաջ մամուլում լուր տարածվեց, թե Բագրատաշենի մաքսակետում ՊԵԿ պաշտոնյաները մաքսային կետ-բաժանմունքի պետի (հերթափոխի) աշխատասենյակում «ռազբորկա» են արել, գործը հասել է բռունցքներին։
MediaHub.am-ը կապ հաստատեց ՊԵԿ լրատվական բաժին՝ հասկանալու, թե ի՞նչ է կատարվել, արդյոք որևէ արձագանք լինելու է։
«Լուրը հայտնել են ոստիկանության աղբյուրները, Քննչականը, իրենց հետ կապ հաստատեք»,- ասացին ՊԵԿ լրատվականից։
Հարցին, թե, այնուամենայնիվ, ի՞նչ դիրքորոշում ունի ՊԵԿ-ը կատարվածի մասով, մեզ պատասխանեցին՝ իրենք գուցե տեղեկատվություն ունեն, բայց չեն մեկնաբանի, քանի որ տեղեկատվությունը Քննչականն է տարածել․
«Մենք ասելու բան չունենք, թող իրենք ասեն»,- եղավ պատասխանը։
Այն, որ ՊԵԿ-ն ասելիք չունի, հասկանալի չէ, բայց, այնուամենայնիվ, կապ հաստատեցինք Քննչական կոմիտեի մամուլի խոսնակ Վարդան Թադևոսյանի հետ։ Վերջինս ևս տեղեկատվություն չուներ, թեև միջադեպի մասին լուրն արդեն մոտ երկու ժամ է՝ մամուլում ամենաքննարկվող թեման է։
«Մենք հաղորդագրություն չենք տարածել այդ մասով։ Մի ժամից զանգեք, փորձեմ ճշտել, թե ինչ է կատարվում»,- ասաց Թադևոսյանը։
Գուցե մենք առիթ հանդիսանանք, որպեսզի համապատասխան գերատեսչությունները ծանոթանան իրենց տիրույթում զարգացումներին: Իսկ մենք մեկ ժամից կապ կհաստատենք ՔԿ, որպեսզի հասկանանք՝ ի վերջո, ի՞նչ է կատարվել Բագրատաշենի մաքսակետում։
Նարե Գնունի