Պեմզաշենում օրեր առաջ տեղի ունեցած ողբերգական դեպքից հետո գյուղի բնակչությունը խուճապի մեջ է։ Ինչպես MediaHub-ի հետ զրույցում ասաց Պեմզաշենի համայնքապետ Աղասի Վարդանյանը՝ գյուղացիները շոկի մեջ են, լարված վիճակում։
Հիշեցնենք, որ նոյեմբերի 9-ին Պեմզաշենի տներից մեկում հայտնաբերվել են 31-ամյա կնոջ եւ նրա 2 երեխաների դիերը։ Մահացածներն են 31-ամյա Զարինե Մ-ն, 12-ամյա Կարինեն եւ 8-ամյա Սարգիսը։ Դեպքի առթիվ հարուցվել է քրեական գործ Քրեական օրենսգրքի 155-րդ հոդվածի 1-ին՝ սպանություն՝ ապօրինաբար մեկ ուրիշին կյանքից զրկելը և 155 հոդված 2-րդ մասի 5-րդ աչափահասի սպանությունը կետերով։
Դեպքից հետո, բնական է, մի շարք վարկածներ են հանրության շրջանում շրջանառվում: Այդ թվում և ադրբեջանական կողմից դիվերսիոն ներթափանցման մասին, սակայն այս լուրերը Պեմզաշենի համայնքապետը որպես ասեկոսե է որակում։
«Ընդամենը ասեկոսեներ են, այս պահին ռեալ որեւէ վարկած չկա»,-ասաց նա։
Գյուղից MediaHub-ին ասացին, որ Ոստիկանության աշխատակիցները գյուղացիներին հարցաքննելու համար պարբերաբար նրանց տներ են մտնում։ Ըստ երեւույթին, համագյուղացիների շրջանում հարցաքննությունները պայմանավորված են նրանով, որ մարդասպանությունից 2 օր անց հանցագործը կամ հանցագործները դեռեւս չեն բացահայտվել։
Պեմզաշենի համայնքապետը նշեց, որ հոգեհանգստի արարողությունը հավանաբար տեղի կունենա այսօր։
Լիա Սարգսյան