Այս ամիս Գերմանիայում գործարար վստահության մակարդակը սպասվածից ավելի է ընկել՝ հասնելով երկու տարվա նվազագույնին՝ էներգիայի բարձր գների եւ բնական գազի հնարավոր դեֆիցիտի հետ կապված մտահոգությունների ֆոնին, հաղորդում է AP-ն:
Ifo ինստիտուտը հայտնել է, որ իր ամսական վստահության ինդեքսը հուլիսին ընկել է մինչեւ 88,6 կետ՝ անցյալ ամսվա 92,2-ից: Սա երկրորդ անընդմեջ անկումն է, եւ ինդեքսը հասել է 2020 թվականի հունիսից ի վեր ամենացածր մակարդակին։ Տնտեսագետները կանխատեսում էին մինչեւ 90,1 անկում։
Անկումը պայմանավորված էր հաջորդ վեց ամիսների ընթացքում ընկերությունների կանխատեսումների վատթարացմամբ, սակայն նրանք նաեւ գոհ չեն իրենց ընթացիկ դիրքից:
«Ընկերություններն ակնկալում են, որ առաջիկա ամիսներին բիզնեսը շատ ավելի դժվար կլինի,- ասվում է Ifo-ի հայտարարության մեջ,- Էներգիայի բարձր գները եւ գազի պակասի ապառնալիքն անդրադառնում են տնտեսության վրա: Գերմանիան ռեցեսիայի շեմին է»։
Ռուսաստանից Գերմանիա «Հյուսիսային հոսք 1» գազատարով բնական գազի մատակարարումները վերսկսվել են անցած շաբաթ՝ տեխնիկական սպասարկման համար 10-օրյա դադարից հետո, սակայն դեռեւս ծանրաբեռնված են ամբողջ հզորության ընդամենը 40 տոկոսով, ինչպես եղել է հունիսի կեսերից: Ռուսաստանից ապագա մատակարարումների հեռանկարները, որը վերջին շրջանում կազմում է Գերմանիայի գազի մատակարարումների մոտ մեկ երրորդը, անորոշ են:
Գերմանիայի կառավարությունը հայտարարել է, որ կավելացնի գազի պահեստավորման իր պահանջները եւ լրացուցիչ միջոցներ կձեռնարկի ձմռանը էներգետիկայի, էլեկտրաէներգիայի արտադրության եւ տների ջեռուցման համար օգտագործվող գազը խնայելու համար։
Ifo-ի հարցումը հիմնված է բիզնեսի տարբեր ոլորտների մոտ 9000 ընկերությունների պատասխանների վրա: