Մայիսի 21-ին Հայաստանում անցկացվեց «Թանգարանների գիշեր» համաեվրոպական միջոցառումը, որի ընթացքում հայաստանյան բոլոր թանգարաններն իրենց դռներն էին բացել այցելուների առաջ։
Տոնի նպատակն է` համախմբել թանգարանները հասարակության և մարդկության առջև ծառացած գլոբալ մարտահրավերների շուրջ, միաժամանակ բարձրացնել հանրային իրազեկվածությունը՝ այդ մարտահրավերների դիմագրավմանը և լուծմանն ուղղված թանգարանների կարևորագույն դերի և հնարավորությունների մասին:
MediaHub.am-ը փորձեց հասկանալ, թե ինչպես է անցել միջոցառումը ՀՀ-ում, արդյոք ավելացե՞լ է թանգարաններ այցելող քաղաքացիների թիվը, սակայն ԿԳՄՍ նախարարությունից հայտնեցին, որ իրենք տվյալներ չեն հավաքագրում, իսկ Երևանի քաղաքապետարանից էլ նշեցին, որ համայնքապատկան թանգարաններ այցելությունների թիվն ամփոփվում է տարեվերջին։
«Յուրաքանչյուր թանգարան առանձին ՊՈԱԿ է, և եթե ուզում եք թիվ ստանալ, ապա պետք է դիմեք հենց թանգարաններին»,- մեզ հետ զրույցում ասաց ԿԳՄՍՆ խոսնակ Գեղամ Մելիքբեկյանը։
Դե, բնական է, որ հայաստանյան բոլոր թանգարաններից տվյալներ ստանալը բավականին ժամանակատար գործ է, բայց ընդհանուր պատկեր ստանալու համար MediaHub.am-ը փոքրիկ հարցախույզ իրականացրեց՝ հասկանալու, թե որքանո՞վ են քաղաքացիները հետաքրքրված թանգարաններով, և ընդհանրապես, որքանո՞վ է մշակույթը ձգում մարդկանց։
Եղիշե Չարենցի տուն-թանգարանի այցելուների թիվն, օրինակ, այս տարի, նախորդների համեմատ բավականին ավելացել է։
«2019-ին 1873 այցելու ենք ունեցել, 2020 թվականին կորոնավիրուսային հիվանդության պատճառով որևէ միջոցառում չենք անցկացրել։ 2021 թվականին 690 այցելու ենք ունեցել, իսկ այս տարի` 2759 այցելու»,- տեղեկացրին թանգարանից՝ հավելելով, որ մարդիկ համավարակից ու պատերազմից հետո վերադառնում են դեպի մշակութային կյանք։
Բուսաբանության թանգարանի այցելուների թիվը նախորդ տարիների համեմատ ևս ավելացել է՝ հասնելով 2018 թվականին արձանագրված տվյալներին։
«Նախորդ երկու տարիներին մենք տարբերվող պայմաններում ենք աշխատել։ 2020-ին ընդհանրապես այցելուներ չենք ունեցել, 2021-ին շատ կարճ են տևել Թանգարանային գիշերներին նվիրված միջոցառումները, իսկ այս տարի 2000 այցելու ենք ունեցել։ Մեզ մոտ այցելուների թիվն այդ օրերին, գրեթե միշտ էլ 2000 և ավելի է եղել, չհաշված նախորդ երկու տարիները»,- նշեցին թանգարանից։
Խաչատուր Աբովյանի տուն-թանգարանի այցելուների թիվը ևս ավելացել է՝ հասնելով 250-ի։
«Նախորդ տարիների համեմատ թիվն աճել է, անգամ 2018-19 թվականներին նման թիվ չենք ունեցել»,- նշեցին թանգարանից։
Այսինքն՝ կարող ենք փաստել, որ ներքաղաքական թոհուբոհի ֆոնին մշակութային միջոցառումները սկսել են հետաքրքրել քաղաքացիներին։
Նարե Գևորգյան