Մենք չգիտենք, թե ինչի մասին են բանակցում ՀՀ և Ադրբեջանի իշխանությունները: Այս մասին այսօր լրագրողների հետ ճեպազրույցում հայտարարեց «Հայրենիք» կուսակցության նախագահ Արթուր Վանեցյանը, ով միացել է հանուն Արցախի ստորագրահավաքին:
Պատասխանելով լրագրողի հարցին, նա ասաց, թե չի հավատում, որ այս փուլում ինչ-որ թուղթ կստորագրվի, որովհետև Նիկոլ Փաշինյանն ամեն ինչ անում է իր իշխանությունը պահելու համար.
«Նա ցանկացած քայլի գնում է դա անելու համար, իսկ թուղթ ստորագրելուց հետո կա վտանգ, որ հանրությունը դուրս կգա փողոց և իր իշխանությանը վտանգ կսպառնա»,- ասաց նա:
Արթուր Վանեցյանը շեշտեց՝ Փաշինյանն այս փուլում առանց թուղթ ստորագրելու էլ իրականացնում է Ադրբեջանի ցանկությունները և վերջին իրադարձությունները՝ Տեղ գյուղի հետ կապված, դրա վառ օրինակն են:
«Ի՞նչ տեղի ունեցավ Տեղ գյուղում. այդ մասին երկար չխոսվեց, շատ չխոսվեց: Տեղ գյուղում ունեինք տարածքներ, որոնք պահպանվում էին ՀՀ ԶՈՒ կողմից, և ինչ-որ մի օր մենք իմացանք, որ մեր ԶՈՒ-ն այդ տարածքից դուրս են եկել և այդ տարածքը՝ առանց խոչընդոտի, առանց մարտերի ու դիմադրության զբաղեցրել են Ադրբեջանի զինված ուժերը: Փաստացի զբաղեցրել են ՀՀ սուվերեն տարածքը: Դրանից հետո աշխատանքից ազատվեց ԱԱԾ սահմանապահ զորքերի հրամանատարը և փորձեցին ասել, թե թերացել է այդ պաշտոնյան: Բայց ոչ մեկը հարց չի տալիս՝ եթե մի պահ դատարկ է մնացել այդ տարածքը, որից օգտվելով Ադրբեջանը դրանք զբաղեցրել է, սահմանապահ զորքերի մեղքը ո՞րն է: Նրանք իրենց ասված ժամին եկել են և տեսել, որ Ադրբեջանն արդեն զբաղեցրել է: Իսկ ո՞վ պետք է պատասխան տա այդ թերացման համար, որի արդյունքում օկուպացվել է ՀՀ սուվերեն տարածք և ունեցել ենք զոհեր: Ո՞վ է պատասխան տալու, թե՞ ասելու են թերացել ենք: Թերացել եք, գնացեք գլուխներդ պատին տվե՛ք»,- ասաց Վանեցյանը:
Մանրամասները՝ տեսանյութում