Ուկրաինայի նախարարների կաբինետը շաբաթ օրը կայացած նիստում որոշել է խզել ատոմային էներգետիկայի ոլորտում գիտատեխնիկական և տնտեսական համագործակցության մասին Ուկրաինայի և Ռուսաստանի կառավարությունների միջև համաձայնագիրը։ Այս մասին հայտարարել է Գերագույն ռադայում կառավարության ներկայացուցիչ Տարաս Մելնիչուկը։
«Ուկրաինայի կառավարության և Ռուսաստանի Դաշնության կառավարության միջև 1993 թվականի հունվարի 14-ին Մոսկվայում կնքված միջուկային էներգետիկայի ոլորտում գիտատեխնիկական և տնտեսական համագործակցության մասին համաձայնագիրը դադարեցվել է»,- գրել է նա Telegram-ի ալիքում։
Օգոստոսի 23-ին ՌԴ ֆինանսների նախարարությունը հայտարարել է, որ Կիևը դուրս է եկել Ռուսաստանի հետ եկամտի և գույքի կրկնակի հարկումից խուսափելու և հարկերից խուսափելը կանխելու մասին համաձայնագրից։ Ուկրաինայի կառավարությունը խզել է նաև Բելառուսի հետ մի շարք համաձայնագրեր, մասնավորապես՝ ներքին ջրային ուղիներով նավարկության, պաշտպանական ձեռնարկությունների համագործակցության և երկու երկրների ներքին գործերի նախարարությունների համագործակցության վերաբերյալ։