Մենք ունենք զինված ուժեր, ունենք շտաբի պետ, և զինվորականները զբաղվում են իրենց գործառույթներով, իսկ մենք ներդրում ենք ունենում բանակում։ Այդ մասին այսօր՝ Կառավարության նիստից հետո, լրագրողների հետ զրույցում ասաց պաշտպանության նորանշանակ փոխնախարար Հրաչյա Սարգսյանը՝ արձագանքելով դիտարկմանը, որ պաշտպանության նախարարից մինչև փոխնախարար կապ չունեն զինվորական գործի հետ։
Սարգսյանը հրաժարվեց պատասխանել, թե ինչ ոլորտ է կարգավորելու։
«Այս պահին դրությամբ թույլ տվեք չպատասխանել։ Եթե օրենսդրության տեսանկյունից պատկերացնեք մեր բանակի կառուցվածքը, ապա կհասկանաք, որ այն մեծ տնտեսություն է, քաղաքապետարանն էլ է մեծ տնտեսություն, և իմ փորձը այստեղ օգուտ կտա»,- նշեց նա։
Հրաչյա Սարգսյանը նկատեց՝ գործն իրեն ընդհանրապես խորթ չէ։
«Իսկ զինվորական մասով թույլ տվեք չպատասխանեմ»,- ասաց նա։
Հարցին, թե արդյո՞ք առաջիկայում գնալու է Ջերմուկ, Ներքին Հանդ․․․, որպեսզի տեսնի՝ ինչպես է փոխվել բնագիծը, Հրաչյա Սարգսյանը պատասխանեց՝ այդ հարցերին հետո կպատասխանի, դեռևս գործն իրեն խորթ է։
Դիտարկմանը, թե արդյո՞ք պետության հանդեպ ոչ կոռեկտ վերաբերմունք չէ այն, որ անհասկանալի կադրային տեղաշարժեր են իրականացվում, Հրաչյա Սարգսյանն արձագանքեց՝ հարցի տրամաբանությունից կարելի է ենթադրել, որ բանակում չպիտի լինեն քաղծառայողներ։
Հարցին, թե ի վերջո, մենք ի՞նչ բանակ ենք ունենալու՝ տարածք գրավո՞ղ, թե՞՝ նահանջող, Հրաչյա Սարգսյանը պատասխանեց՝ ինչո՞ւ նահանջող․
«Որ դուք լինեիք նախարար, նահանջող բանակ պիտի ունենայի՞ք։ Ես չեմ տեսնում նահանջողական մոտեցում»։
Մանրամասները՝ տեսանյութում։