Հայաստանում ճանապարհների սպասարկման որակը խայտառակ վատ է։ Այդ մասին այսօր Կառավարության նիստի ժամանակ ասաց Նիկոլ Փաշինյանը։
Նրա խոսքով՝ երբ ձյուն է տեղում, ճանապարհը սպասարկող ընկերության մեքենաները մաքրում են, իսկ երբ անձրև է գալիս, ոչինչ չի արվում։
«Անձրևաջրերը լցվում են ճանապարհի վրա, բոլորը սպասում են կարծես ավելի կառուցողական անձրևի, որ գա մաքրի այդ ջրերը։ Լավ անձրև ու ձյուն չի գալիս, ոչ ոքի մտքով չի անցնում, որ այդ ճանապարհներն ամենօրյա ռեժիմով մաքրվեն։ Կառավարության որոշմամբ՝ ճանապարհների սպասարկմամբ զբաղվող ընկերությունը ամեն օր, անկախ եղանակից, ճանապարհը պետք է ավլի՝ երթևեկելի հատվածի ամբողջ երկայնքով»,- ներկայացրեց Փաշինյանը։
Բացի այդ, ըստ Փաշինյանի, ճանապարհային նշանները ևս խնդիր են առաջացնում, քանի որ 70-ական թվականներից հետո չեն փոխվել։
«Կամ ճանապարհին առաջացած փոսերը, ճաքերը, որոնք սպասարկող ընկերությունը պարտավոր է վերացնել։ Դիլիջան-Իջևան ճանապարհի ամեն կիլոմետրին փոս է, ո՞վ է զբաղվելու դրանով, ինչի՞ պիտի երկրի վարչապետը սրան անդրադառնա, նշանակում է՝ ինչ որ մարդիկ իրենց աշխատանքը չեն կատարում ընդհանրապես։ Զեկուցեք՝ ովքեր են այդ մարդիկ, ինձ անուն-ազգանուններ ներկայացրեք»։
Մանրամասները՝ տեսանյութում։