Նախագիծի դրական իմաստը հասկանալի է, բայց կարծում եմ՝ սա վատ վարքագիծ է դաստիարակելու մեզ մոտ, հետևաբար, այն երիտասարդները, որոնք հիմա 25 տարեկանից բարձր են, վաղը կդառնան 27 տարեկան, ի՞նչ է լինելու իրենց հետ։ Մյուս հարցն էլ գիտե՞ք, թե այդ 5000 անձը քանի տարեկանից են լքել հայրենիքը։ Եվ երրորդ հարցը՝ ասենք, էդ համաներումը արեցինք, էդ ձեր բարի նպատակները, որ հետապնդում եք, որքանո՞վ են իրականացվելու, էնտեղ ընդհանրապես փողի հարց չկա։ Այս մասին այսօր ՀՀ ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը հետաքրքրվեց թիմակից Հայկ Սարգսյանից, որն ԱԺ-ին է ներկայացնում իր օրենքի նախագիծը։
Նշենք, որ ըստ այդ օրենքի նախագծի հնարավորություն է տրվելու 27 տարին լրացած, սակայն պարտադիր զինվորական ծառայություն չանցած քաղաքացիներին ազատվել գործող օրենսդրությամբ սահմանված քրեական պատասխանատվությունից։
Ըստ պատգամավորի` նրանք այդ հնարավորությունը կունենան զինվորական ծառայության անցնելու կամ կրճատված ժամկետով ծառայության և ՀՀ պետական բյուջե համապատասխան գումարներ վճարելու միջոցով։
Հայկ Սարգսյանը նշեց, որ օրենքը սահմանվելու է միայն այն անձանց նկատմամբ, որոնց 25 տարին լրացած կլինի օրենքի ընդունման պահին։
«Այսինքն, այն մտավախությունը, որ այսօր մարդիկ 18 տարեկանում կլքեն երկիրը, որպեսզի 27 տարեկանում օգտվեն օրենքից, չի համապատասխանում իրականությանը։ Օրենքից օգտվելու են այն մարդիկ, որոնք օրենքի ընդունման պահին կլինեն 25 տարեկան կամ ավելի բարձր»,- ասաց Հայկ Սարգսյանը։
Աղազարյանն էլ արձագանքեց․ «Երբ ասացի 25 տարեկան, նկատի ունեի 24 տարեկան, պարզ էր իմ հարցի իմաստը։ Հետո ի՞նչ ենք անելու, հետո նոր խորհրդարան է գալու, նոր Հայկ Սարգսյան ա գալու և նոր օրենքի նախագիծ ա բերելու, էսօրվա 24-25 տարեկանների համար, պարոն Սարգսյան»։
Աղազարյանի զայրույթին Սարգսյանը հանգիստ պատասխանեց․ «Պարոն Աղազարյան, Դուք ի՞նչ եք առաջարկում, էսքան քաղաքացիներին ասենք՝ «չէ, պետք ա բոլորդ դատապարվեք», ու չտա՞նք հնարավորություն։ Եթե քաղաքացին կարա 5 տարի դատապարվի և բանտարկվի, ենթադրվում է, որ նա նաև կարող է ծառայել և իր պետությանը պիտանի լինել, մենք չենք էլ կարողանում այդ քաղաքացիներին դատապարտել։ Թվեր ասեմ՝ 2022 թվականին ունեցել ենք 10 հազարից ավելի քաղաքացիներ, որոնք հետախուզվել են բանակում չծառայելու համար, որոնցից միայն 420-ն է հայտնաբերվել ու կամովի ներկայացել, բայց նրանցից միայն 1-ն է դատապարտվել, այն էլ մեկ տարով»։
Մանրամասները՝ տեսանյութում