Խաղաղության հարցը պետք է լուծվի. եթե նախորդ օրերի պես շարունակեն կրակել տների ուղղությամբ, այստեղ մարդ չի մնա

Ադրբեջանի ՊՆ-ն հերթական հաղորդագրությունն է տարածել, թե իբր ապրիլի 2-ին՝ ժամը 13։55-ից 14:05-ն ընկած ժամանակահատվածում, ՀՀ ԶՈՒ ստորաբաժանումները կրակ են բացել սահմանագոտու հարավարևելյան հատվածում տեղակայված ադրբեջանական դիրքերի ուղղությամբ, մեր ռազմական գերատեսչությունն էլ այն հերթական անգամ հերքեց, նշելով, որ  դրանք իրականությանը չեն համապատասխանում։ 

Արդեն 2-րդ օրն է՝ սահմանագոտու հարավարևելյան հատվածում կատարյալ հանգիստ է։ Այս մասին MediaHub-ին փոխանցեց Սյունիքի մարզի Խնածախ գյուղի բնակիչը։

«Ոչ մի կրակոց չի հնչել, ոչ մի ձայն չի եղել։ Ամեն ինչ խաղաղ է եղել։ Որ չեն կրակում՝ մենք էլ ենք հանգիստ լինում, խուճապ ու անհանգստություն չկա։ Խաղաղության հարցը պետք է լուծվի։ Եթե նախորդ օրերի պես լինի ու շարունակեն կրակել տների ուղղությամբ, այստեղ մարդ չի մնա»,- նշեց բնակիչը։ 

Նրա կարծիքով՝ այս հանգստությունը ժամանակավոր է այնքան ժամանակ, քանի դեռ ադրբեջանական կողմը շարունակ կեղծ հաղորդագրություններ է տարածում սահմանային խախտումների վերաբերյալ։ 

«Մեղադրում է մի բանում, որը մենք չենք արել։ Իրենք էլ գիտեն, որ Հայաստանը, եթե ընտրել է խաղաղության ճանապարհը, ինչ էլ լինի, սադրանքի չի գնա, արկածախնդրություն չի անի»,- ասաց նա։ 

Իսկ ահա երկօրյա խաղաղությունը մեր զրուցակիցը պայմնավորում է տարածաշրջանում պայթյունավտանգ իրավիճակով։ Խոսքը, մասնավորապես, ԱՄՆ-Իրան-Իսրայել հակամարտության մասին է, որտեղ որևէ գործողություն սկսվելու դեպքում Հայաստանն ու Ադրբեջանը՝ որպես Իրանի հարևաններ, կունենան իրենց դերակատարոււմը։

«Կարծում եմ՝ Ադրբեջանը կօգտվի այդ առիթից և Իսրայելի հետ դուրս կգա Հայաստանի ու Իրանի դեմ։ Ամեն դեպքում, առաջ չընկնենք, սպասենք խաղաղության»,- նշեց MediaHub-ի սյունեցի զրուցակիցը։

Հունան Թադևոսյան