Սոչիում տեղի ունեցած Պուտին-Փաշինյան-Ալիև եռակողմ բանակցությունների ու համատեղ հայտարարության մասին կարելի է հանդիպել բազմաթիվ փորձագիտական գնահատականների, ընդ որում՝ իրարամերժ:
Սակայն ինչ էլ պնդեն տարբեր գործիչներ, փորձագետներ, ակնհայտ է՝ եռակողմ հայտարարությունն առաջին հերթին ամրագրում է Ռուսաստանի գերակա դերը տարածաշրջանում: Ու սա անկախ նույնիսկ ուկրաինական պատերազմից, ինչի հետևանքով Մոսկվայի տարածաշրջանային կարողություններն էապես սահմանափակվել են:
Սակայն Սոչին առանձնահատուկ էր նաև այլ առումով՝ իրանական «ներկայության» գործոնով:
Հատկանշական է, որ Սոչիի բանակցությունից ընդամենը ժամեր առաջ Իրանի ԱԳ նախարարը զանգել է Ադրբեջանի իր գործընկերոջը ու Թեհրանի դիրքորոշումն է փոխանցել՝ Հարավային Կովկասում արտատարածաշրջանային ուժերի ներկայության անթույլատրելիության մասին, որն անխոս անուղղակի աջակցություն է հայ- ադրբեջանական հարաբերությունների կարգավորման ռուսական տարբերակին:
Սոչիի բանակցություններին զուգահեռ Թեհրանն անոնսավորեց Նիկոլ Փաշինյանի՝ նոյեմբերի 1-ին Իրան կատարելիք այցի մասին:
Երեկ այդ այցը կայացավ:
Հայաստանի վարչապետի այցն Իրանի Իսլամական Հանրապետություն, անկասկած, բեկումնային կլինի երկու երկրների զարգացման գործում, հայտարարել է նախագահ Էբրահիմ Ռաիսին՝ Նիկոլ Փաշինյանի հետ բանակցություններին հաջորդած ասուլիսի ընթացքում։
«Երկու երկրների միջև լավ հարաբերությունները միանշանակ դրական ազդեցություն կունենան տարածաշրջանում և աշխարհում»,- հայտարարել է Ռաիսին։
Իրանի նախագահի խոսքով՝ կովկասյան տարածաշրջանում զարգացումները, անվտանգությունն ու խաղաղությունը շատ կարևոր են Իրանի համար։
Նա վերստին պնդել է՝ տարածաշրջանային խնդիրները պետք է լուծեն տարածաշրջանային դերակատարները։ «Օտարների կողմից ցանկացած միջամտություն խնդրի լուծման փոխարեն խնդիրներ կստեղծի», - հայտարարել է նախագահ Ռաիսին։
Նա փաստորեն Փաշինյանին փոխանցել է նույն ուղերձն, ինչն իր կաբինետի ԱԳ նախարարը փոխանցել էր Բաքվի իր գործընկերոջը:
Այդպիսով, Սոչիի առանձնահատկություններից մեկն այն է, որ այն նկատելի դարձրեց Մոսկվայի ու Թեհրանի օրակարգերի ընդհանրությունը:
Վահրամ Բագրատյան