ՄԻՊ աշխատակազմին «ՀՀ 2023 թ. պետական բյուջեի մասին» օրենքի նախագծով կհատկացվի 612 մլն 307 հազար դրամ: Այս տարվա սպասվող ծախսերի հանրագումարը կազմում է 542 մլն 400 հազար դրամ, իսկ 2021 թ. փաստացի ծախսերը կազմել են 531 մլն 272 հազար դրամ:

Այս մասին ԱԺ մարդու իրավունքների պաշտպանության եւ հանրային հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում հայտարարել է Մարդու իրավունքների պաշտպան Քրիստիննե Գրիգորյանը՝ ներկայացնելով իր ղեկավարած կառույցի բյուջետային ծրագրերը:

Հիշենք, որ Մարդու իրավունքների նախկին պաշտպան Արման Թաթոյանը հաճախակի էր ահազանգում Կառավարության՝ ՄԻ պաշտպանի աշխատակազմի հանդեպ խտրական վերաբերմունքից: Մասնավորապես, մեկ տարի առաջ  նա հայտարարել էր, որ Կառավարության առաջարկած փոփոխության համաձայն կարող է կրճատվել Մարդու իրավունքների պաշտպանի գրասենյակի տարեկան բյուջեն։

«Այս նախագիծը խտրական է և ուղղված է ՄԻՊ-ի գործունեությունը սահմանափակելուն»,- ասել էր Թաթոյանը՝ ներկայացնելով այն նախագիծը, որով  նախատեսում էր վերացնել Հայաստանի Մարդու իրավունքների պաշտպանի անկախությունը կառավարությունից և Ազգային ժողովում կառավարող խմբակցությունից:

Բայց քանի որ Քրիստիննե Գրիգորյանը գործող իշխանության, այսպես կոչված, սրտի ՄԻՊ-ն է, որի համար նրան հաճախակի ՆԻՊ  են անվանում (Նիկոլի իրավունքների պաշտպան), ապա վստահաբար կարող ենք ենթադրել, որ նման շռայլությունները ՄԻՊ աշխատակազմի նկատմամբ սովորական են լինելու: Այդ իսկ պատճառով մենք նրան ավելի հաճախ կտեսնենք Կառավարության անդամների հետ այս կամ այն միջոցառմանը մասնակցելիս, ինչը նախկին ՄԻ պաշտպանների դեպքում չենք տեսել (Եռաբլուր այցը վկա):

Դե իսկ որքանով անկաշկանդ ու, կարևորը, անկախ կլինի ՄԻՊ-ՆԻՊ Գրիգորյանը նույն այդ Կառավարությունից ՝ հարցը դասվում է հռետորականների շարքին:

Վահրամ Բագրատյան