Վերջին շրջանում ավտոմեքենաներից գողության դեպքերի թվի մասին ահազանգերը չեն դադարում։

Հաճախ կրկնվող այս դեպքերը շատերի համար արդեն սովորական երևույթ է դարձել, որի թիրախում են հայտնվել նաև պատգամավորները։ Օրինակ շաբաթներ առաջ «Հայաստան» խմբակցության պատգամավոր Ագնեսա Խամոյանը նույնպես հանդես եկավ հայտարությամբ նշեց, որ չի դիմում ոստիկանություն քանի որ չի վստահում։

Ստեղծված իրավիճակում Mediahub-ը գրավոր հարցում ուղարկեց ՆԳՆ հասկանալու համար, թե ի՞նչ մասշտաբների է հասնում դեպքերի թիվը։

Ճշտող հարցին, թե ի՞նչ է արվում նվազեցնելու կամ կանխելու մեքենաններից ավտոպահեստամասերի գողությունների թիվը, որին ի պատասխան գրել էին՝ հանցատեսակի նախականխման, կանխման և բացահայտման նպատակով իրականացվում են օպերատիվ-հետախուզական միջոցառումներ, մասնավորապես, բակային տարածքներում և գիշերային ժամերին ուժեղացվել է օպերատիվ խմբերի շրջագայությունը։ 

«Կատարվել է քարտեզագրում, որի հիման վրա ՀՀ ՆԳՆ ոստիկանության պարեկային ծառայության կարգախմբերը գիշերային ժամերին իրականացնում են շրջագայություններ թիրախային հասցեների տարածքներում։ Միաժամանակ, իրականացվում են հսկողական-կանխարգելիչ (պրևենտիվ) միջոցառումներ տրանսպորտային միջոցներից կատարված գողոնի իրացման հավանական վայրերում»։

Հիմա անցնենք հստակ թվերի․  2020-2024 թթ․ և 2025 թվականի 9 ամիսների ընթացքում ՀՀ տարածքում արձանագրված ավտոմեքենաներից կատարված պահեստամասերի գողությունների վերաբերյալ նշվում է, որ 2020-ին դեպքերի թիվը հասել է 1737-ի, 2021-ին 2185-ի, 2022 թվականին 1787, 2023 թվականին նվազել է՝ 1009, 2024` 922-ի, 2025-ի առաջին 9 ամիսներին 782 դեպք է գրանցվել։

Մեզ ահազանգած քաղաքացիները պատմում են, որ լինում են դեպքեր, երբ հանցագործը թողնում է տելեգրամյան ալիքի հասցե, որի միջոցով կարող են գնել իրենց մեքենայից գողացված ավտոպահեստամասերը։ Մենք սրա մասին հայտնեցինք նաև ՆԳՆ նախարարության ու հարցրինք, թե քանի՞ նման դեպք է գրանցվել, քանի՞սն են բացահայտվել, պատեկերն այս անգամ այդքան էլ հուսադրող չէր։

Եվ այսպես, նման դեպքեր սկսվել են գրանցվել 2021-ից, որի թիվը հասնում էր 119-ի, դրանից բացվահայտվածների թիվը ընդամենը 11-ն է, չբացահայտվածը՝ 108։ 2022-ին քիչ դեպքեր են եղել (20 դեպք), սակայն դրանցից ոչ մեկը չի բացահայտվել։ 2023-ի պատկերը նույնպես հուսադրող չէ, գրանցված 8 դեպքերը չբացահայտվածների շարքում են։

Նույն պատկերն է նաև 2024 թվականին (գրանցված 5 դեպք), և 2025 թվականին  (53 դեպք), որոնք նույնպես շարունակում են չբացահայտված մնալ։

Մեր հարցին ի պատասխան նախարարությունից նաև հայտնել են, որ  ավտոմեքենաներից կատարված պահեստամասերի գողությունների և շորթումների դեպքերով հիմնականում հափշտակվում են կողային հայելիներ, թափարգելներ, լուսարձակներ, տարբերանշաններ և այլն։

Գրավոր հարցման պատասխանն այն խոսուն փաստն է, որի մասին ահազանգում են քաղաքացիները՝ խնդիրը մեծամասամբ լուծում չի ստանում, դրա համար էլ շատ քաղաքացիներ հարկ չեն համարում դիմել ոստիկանություն և նշված թվերից զատ լինում են դեպքեր, որոնցից տեղյակ չէ նախարարությունը։

Էմմա Մարտիրոսյան