Մինչև վերջ գնալու ենք, Գյումրիով մեկնարկը տալու ենք, պաշտոնապես հայտարարում եմ․ Մարտուն Գրիգորյան
Ոչ մի պաշտոնյայի թույլ չեմ տվել ու թույլ չեմ տալու, որ մեր ուժեղ, դժվարություններով ու փորձություններով անցած քաղաքին նայեն ռայոնի աչքերով։ Այդ մասին այսօր՝ նախընտրական քարոզարշավի մեկնարկին ասաց Գյումրու քաղաքապետի թեկնածու, «Մեր քաղաքը» դաշինքի առաջին համար Մարտուն Գրիգորյանը։
Նրա խոսքով՝ իրենք թույլ չեն տալու, որ ժողովրդի իշխանությունը խլեն իր ձեռքից, ինչպես, օրինակ՝ «Բալասանյան դաշինքի» դեպքում, երբ ընտանիքի անդամի կալանքով կարողացան ստիպել Սամվել Բալասանյանին հրաժարվել ժողովրդի քվեից։
«Ես կնախընտրեմ կալանքը, բայց չեմ նախընտրի ժողովրդին հուսախաբ անելը։ Մարդ ենք, տղա ենք, էս ամենը բոլորիս համար է։ Ես չեմ եկել մի քանի տոկոս ձայն հավաքելու համար ու Գյումրիում մի քանի ավագանու անդամ ունենալու համար։ Ես ամեն ինչ դրել եմ մի կողմ, պատրաստ եմ քայլերի գնալու։ Ես գիտակցաբար մտել եմ այս ամենի տակ»,- նշեց նա։
Գյումրու համայնքապետի թեկնածուն պաշտոնապես հայտարարեց, որ իր հետ կապված որևէ բան չկա, որը կկարողանան օգտագործել իր դեմ, բայց դա չի նշանակում, որ չեն հորինվի ինչ-որ պատճառներ։
«Եթե իմ նկատմամբ ճնշումներ եղան, ասում եմ՝ շառի ու շանտաժի հետևից չեմ գնա։ Հորդորում եմ՝ մինչև վերջ գնալ։ Պայքարելու ենք, որպեսզի կարևոր, բաղձալի հաղթանակը տեսնենք ու երկիրը դուրս բերենք էս վիճակից։ Հավատացեք՝ այսօր ՀՀ-ի բոլոր մարզերից մեր երեսին են նայում, պիտի ցույց տանք գյումրեցու նամուսն ու թասիբը։ Գյումրիով սկսվելու է ամեն ինչ»,- շեշտեց նա։
Մանրամասները՝ տեսանյութում։
Նարե Գևորգյան
